Gobiernu del Principau d'Asturies

Asturies, muncho más cerca

Tas en

Asturias.es Intervención del Presidente del Principáu d’Asturies, Adrián ...
 

Aniciu

Intervención del Presidente del Principáu d’Asturies, Adrián Barbón

Homenaxe a Margarita Salas

21/11/2019

La selmana pasada pudimos escuchar la música del xenoma. En concreto, el xenoma de la leucemia linfática crónica. Más d'un centenar d'estudiantes d'ocho colexos asturianos dedicáronse a interpretar la so secuencia como si fuera una partitura. Depués, decidieron dedicar eses melodíes, quiciabes el primer conciertu xenómicu del mundu, a una persona: a Margarita Salas, a la científica valdesana que güei homenaxamos

Nun sabía que'l xenoma pudiera escuchase. Tala cosa nun m'asocedería nunca: musicar el xenoma paezme daqué como arimar l'oyíu al soníu de fondu de la vida. Tengo de reconocer la creatividá de la Conseyería de Ciencia, Innovación y Universidá, que foi la promotora de la iniciativa. Pero vaigamos un poco más allá. Si too esto ye posible, si güei equí emplegamos con tanta naturalidá estes palabres cargaes de significaos complexos, si les terapies xéniques convirtiéronse nuna gran ventana d'esperanza pal tratamientu d'enfermedaes, ye porque hai, hubo persones que consagraron la so enorme capacidá a la bioloxía molecular. Persones d'excelencia científica mundial como, de nuevo, Margarita Salas.

Ella tendría de tar güei equí, como n'otres ediciones, p'apurrir les beques Severo Ochoa. Finó'l día siete, nun hai siquiera dos selmanes, y aquel xueves tamién foi posible oyer otru soníu: el de la condolencia compartida del mundu de la ciencia por haber perdío una de les sos figures señeras.

La biografía de Margarita Salas ye conocida. Al igual qu'asocede cola de tantes otres muyeres sobresalientes dedicaes a la investigación, precisa mayor atención, pero de xuro esti ye un foru nel que nun fai falta repitir detalles de la so vida, sorrayar la so vinculación con Severo Ochoa nin resaltar la contribución de los sos afayos pa entender los mecanismos de replicación xenética.

Dexen, dexái, por tanto, que ponga l'acentu n'otres facetes rellacionaes cola so traza vital.

Margarita Salas, por exemplu, siempre tuvo claro que la ciencia nun se desenvuelve por si sola nin ye resultáu del xuegu de dados del azar, sinón que precisa una redolada afayadiza, con medios y estímulos. La ciencia d'escelencia, acezaba dicir, consíguese con investigadores d'escelencia. Convencida d'ello, lluchó siempre por facilitar la carrera investigadora de la mocedá , por enanchar el caudal científicu n'España.

Ante esti exemplu, la entruga que nos tenemos de facer toos, y en particular quien exercemos una responsabilidá de gobiernu, nun ye si hai persones con talentu ente nós, sinón si facemos tolo posible por qu’esi talentu prienda y creza. La emoción por descubrir qu'impulsó a Ochoa y a Salas, el mesmu estímulu intelectual qu'anima a Carlos López Otín o cualquier investigador, precisa un llugar fecundu pa desenvolvese con tola so potencia. Espreso la interrogación en voz alta: ¿tamos faciéndolo?

La nuesa bioquímica tamién sabía qu'el so valumbu científicu permitía-y dar visibilidá a les muyeres. Ella mesma confesó qu' nel so entamu sintióse una suerte de bichu raru” qu'analayaba cola bata blanca puesta en llaboratorios d'hexemonía masculina. Seique por esos empiezos foi consciente de que dende la so posición podía contribuyir a dar visibilidá a les muyeres n'ámbitos nos que’n décades ocuparen un segundu planu, cuando nun fueren callaes. Al convertise na primer presidenta del Institutu España, qu'arrexunta toles academies, o al ser la primer española n'ingresar na Academia Nacional de Ciencies de los Estaos Xuníos ayudó a quebrar dalgunos d'esos techos de cristal”.

Otra vez, plantego otra entruga. ¿Podemos danos por contentos colo avanzao hasta agora o tenemos que siguir promoviendo midíes que repercutan a favor de la igualdá, cuantimás nel ámbitu de la ciencia, les matemátiques y la tecnoloxía?

Voi cola tercera y última faceta que me gustaría destacar. Figura de talla internacional, Margarita Salas demostró una y otra vez el so compromisu con Asturies. Non yá exerció como una de les meyores embaxadores de la ciencia española, tamién lo foi del Principáu, ensin dole-y prendes nin caye-y los aníos por ello. Lleeríeis y escucharíeis falar de la so tierra de siguío n'entrevistes y charles. Asumió la presidencia del Conseyu Social de la Universidá d'Uviéu n'años complexos y llideró el conseyu asesor d'espertos del Campus d'Escelencia de la institución académica nun momentu decisivu, cuando llograra ser una de los nueve primeres de tol país en consiguir un sellu de calidá internacional.

Tamién nesti casu la cuestión ye obligada. ¿Puede facese daqué más pa caltener esa vinculación con Asturies? ¿Nun tendríemos d'esforcianos más p'aprovechar el talentu qu'axunten la universidá y los centros d'investigación pa utilizalo como una especie de distintivu de prestíu de la nuesa capacidá científica?

Como alvertiríeis, son entrugues retóriques. Toes y toos sabemos les respuestes afayadices: qu'hemos de sofitar más la ciencia, que tenemos de favorecer la igualdá tamién nel ámbitu científicu, que tenemos qu'esforcianos pa retener y apreciar el talentu.

Pos pongámonos a ello. Precisamente, aprovecho esti actu p'anunciar que'l Gobiernu d'Asturies va crear un programa d'atención y retención del talentu científicu que va llevar el nome de Margarita Salas en memoria de la insigne bioquímica. Va tar destináu a científicos y científiques d'oldeada esperiencia internacional que s'atopen en centros d'investigación nacionales o estranxeros pa que puedan desenvolver la so carrera n'Asturies.

Esta iniciativa fuera pensada va meses. Queríamos que Margarita Salas fora la madrina del programa. Pensábemos formalizar la propuesta va díes, na Selmana de la Ciencia, pero'l so fallecimientu llevónos a retrasala pa espresala güei equí como muestra d'homenaxe. Esperamos que l'aprobación del presupuestu de 2020 nos permita ponelo en marcha lo primero posible. El Gobiernu d'Asturies pretende que'l nome de Margarita Salas se converta nun referente continuu de la vocación científica, la capacidá investigadora y el compromisu con Asturies. Como la música del xenoma, esta ye la nuesa dedicatoria.

   Icono gráfico alusivo al tipo de archivo Ver en formatu orixinal (Pdf: 246 Kb)

Información sobre el documento

© Copyright 2006. Gobiernu del Principau d'Asturies