Gobierno del Principado de Asturias

Asturias, mucho más cerca

Estás en

Aniciu Asturies lidera un programa européu onde van participar 2.000 ...
 

Aniciu

Asturies lidera un programa européu onde van participar 2.000 pacientes de cinco países pa tratar la cronicidá, ún de los mayores retos de los servicios públicos de salú

El proyectu Effichronic, basáu nun métodu desenvueltu pola Universidá de Stanford, céntrase na evidencia de que los enfermos qu’incorporen vezos saludables manexen meyor la so patoloxía y faen un usu más eficiente de los recursos sanitarios. L’oxetivu ye que’l paciente adopte una actitú activa y participe na toma de decisiones sobre’l so estáu

Los técnicos que participaron en el lanzamiento del proyecto en Luxemburgo

16/07/2017

El Principáu lidera los trabayos pal diseñu, la implantación y el desenvolvimientu d’Effichronic, el mayor programa realizáu hasta agora n’ámbitu européu pal abordaxe de la cronicidá, un paradigma nuevu de l’atención sanitaria qu’afecta yá al 35 % de les muyeres y el 29 % de los homes de la Unión Europea y representa un gran desafíu pa los servicios públicos de salú.

Esta estratexa, que’l so aniciu ta nel programa Paciente activu Asturies, tien el sofitu de la Conseyería de Sanidá, la Universidá de Valencia, el Centre Hospitalier Universitaire de Montpellier (Francia), Qismet (Reinu Uníu), l’Erasmus Universitair Medisch Centrum de Rotterdam (Holanda) y l’Ente Ospedaliero Ospedal Galliera (Italia) y ta llamada a ser una ferramienta clave na atención a la enfermedá crónica nos llustros vinientes. En total, va implicar a más de 2.000 pacientes de cinco países y los sos cuidadores.

Técnicos de la conseyería, de la Fundación pal Fomentu n’Asturies de la Investigación Científica Aplicada y la Tecnoloxía (Ficyt) y del Serviciu de Salú del Principáu (Sespa) foron va poco a Luxemburgo pal llanzamientu d’esti proyectu.

Effichronic sofítase na evidencia de que los enfermos crónicos qu’adopten estilos de vida saludables y aprienden a remanar la so patoloxía ameyoren sustancialmente la so calidá de vida y faen un usu más eficiente de los recursos sanitarios. Siguiendo una metodoloxía científica desenvuelta pola Universidá de Standford, l’oxetivu ye que’l paciente aumente la so capacidá de autocuidáu y participe na toma de decisiones sobre la so salú.

La Organización Mundial de la Salú (OMS) calcula que’l 50 % de los europeos van tener polo menos una enfermedá crónica de la que se xubilen. Frente al modelu clásicu d’abordaxe de la patoloxía aguda, el programa Effichronic propón un paradigma nuevu d’atención que fomenta la interacción ente los afectaos y los profesionales sanitarios.

La iniciativa busca demostrar la eficacia de la inversión nes polítiques de prevención y nel manexu de les condiciones cróniques. Nesti sentíu, van evaluase los resultaos rellacionaos cola eficacia del programa p’ameyorar l’adherencia a los tratamientos, l’exerciciu físicu y l’alimentación saludable, la so eficiencia nes actividaes cotidianes del individuu y el so impactu na salú.

La promoción de vezos positivos y saludables y la creación de redes de sofitu pa les persones con enfermedá crónica nes sos propies comunidaes son llinies estratéxiques d’Effichronic que, amás, va valir p’apurrir datos útiles qu’ayuden a la sostenibilidá de los sistemes sanitarios públicos.

El programa avanza nel desenvolvimientu de modelos nuevos d’atención centraos na persona, con un planteamientu innovador y una metodoloxía contrastada qu’aspira a ameyorar los resultaos de salú de la población a quien se dirixe y la so calidá de vida.

Nesti enllaz pue tenese más información sobre’l proyectu:

https://www.asturias.es/portal/site/astursalud/menuitem.2d7ff2df00b62567dbdfb51020688a0c/?vgnextoid=e1679f3a48739410VgnVCM10000098030a0aRCRD

Información sobre el documento

© Copyright 2006. Gobierno del Principado de Asturias