Gobiernu del Principau d'Asturies

Asturies, muncho más cerca

Tas en

Asturias.es Temes Agricultura y montes Politica Forestal Más de 37.000 hectárees de monte arboláu disponen de la ...
 

Politica Forestal

Más de 37.000 hectárees de monte arboláu disponen de la certificación de sostenibilidá forestal n'Asturies

La conseyera de Desarrollu Rural cifra en más de 1,2 millones de metros cúbicos la madera que s’estrái de forma sostenible nel Principáu

De izqda. a dcha.: el director forestal de Aspapel, José Causí; la consejera de Desarrollo Rural y Recursos Naturales, María Jesús Álvarez, y el vicepresidente de la Asociación de Propietarios Forestales de Asturias y presidente de PEFC Asturias. Álvaro Fernández

23/05/2018

Más de 37.000 hectárees de monte arboláu disponen de la certificación PEFC de l'Asociación para la Certificación Española Forestal n'Asturies, lo que supón que más del 8% de la superficie de la comunidá ye monte del que s'estrayen 1.200.000 metros cúbicos de madera de forma sostenible pa la so tresformación, mayoritariamente, en pasta de papel y enerxía.

La conseyera de Desarrollu Rural y Recursos Naturales, María Jesús Álvarez, facilitó güei en Xixón estos datos na inauguración del curso Estratexes de marketing y ventes verdes de productos forestales sostenibles, na que destacó la importancia económica, social y cultural del monte y la necesidá de siguir promoviendo un afayadizu equilibriu ente la so esplotación y el caltenimientu de la diversidá biolóxica qu'alluga'l Principáu.

Amás, señaló la importancia del usu racional de los recursos del monte pa la producción de bienes y servicios “porque los requerimientos de caltenimientu de los espacios forestales nun son escluyentes nin incompatibles cola so vocación granible”, aseguró. “Nun podemos nin queremos arrenunciar a una esplotación sostenible de los recursos forestales, porque sería tanto como arrenunciar a xenerar empléu y riqueza nel mediu rural”, añedió.

La titular de Desarrollu Rural indicó qu’ún de los oxetivos del Principáu ye impulsar actuaciones pa poner a disposición de les industries de primer segunda tresformación de madera que precisen pa la so actividá, la cuenta y en condiciones competitives. Según esplicó, les cortes nos montes asturianos son el resultáu del aprovechamientu de cuatro especies: l'ocalitu, que con un volume de 850.000 metros cúbicos sumó en 2016 el 71% del total; el pinu pinaster y el pinu radiata, con un volume de más de 300.000 metros cúbicos, lo que supunxo'l 26%, y la castañal, qu'apurrió'l 3%, con 31.000 metros cúbicos.

 

Una ferramienta pa garantizar la sostenibilidá

El Gobiernu d'Asturies entiende la certificación forestal como una ferramienta que garantiza la sostenibilidá de los aprovechamientos y la trazabilidá de los sos productos, daqué imprescindible pa competir nun mercáu global, especializáu y cada vez más concienciáu ambientalmente, que demanda una ufierta estremada, con mayor valor añedíu. Por esta razón, la Conseyería de Desarrollu Rural sofita con una subvención nominativa de 100.000 euros a la Entidá Solicitante de la Certificación Rexonal d'Asturies (Escra), con cuenta de que xestione la certificación forestal y garantice la cadena de custodia.

“Trátase d'un procesu d'evaluación realizáu por una entidá independiente que verifica'l cumplimientu de les normes internacionales de xestión al que se someten, de forma voluntaria, dende una unidá de xestión forestal hasta un propietariu o una empresa que consume o produz bienes o servicios forestales”, esplicó la conseyera. Esta certificación forestal ufierta ventayes, yá que garantiza la sostenibilidá de los aprovechamientos forestales, abre mercaos y aumenta el valor del productu. “Ye un elementu clave nel desenvolvimientu rural y na meyora de la calidá de vida de les persones que viven nel campu”, precisó Álvarez.

Esti tipu d’acreditación asegura la viabilidá económica de los montes y permite una xestión ambientalmente afayadiza y socialmente beneficiosa. “Por aciu la certificación de la cadena de custodia favorez la permanencia de les empreses que peracaben y comercialicen productos forestales aumentando la so competitividá, estremándoles y dándo-yos accesu a nuevos mercaos”, apuntó.

La superficie forestal d'Asturies ta percima de la media española y europea. El territoriu del Principáu que ye monte supera'l 70% (770.000 hectárees) y el 58% d'esa superficie ye monte arboláu (453.000 hectárees).

 

 

Información sobre el documento

© Copyright 2006. Gobiernu del Principau d'Asturies