Gobiernu del Principau d'Asturies

Asturies, muncho más cerca

Tas en

Asturias.es Persones con discapacidá Fasad va cuntar nel 2019 con 6,5 millones de presupuestu ...
 

Persones con discapacidá

Fasad va cuntar nel 2019 con 6,5 millones de presupuestu p’atender a más de mil persones

El patronatu de la fundación aprobó güei les cuentes y el programa d'actividaes pal añu viniente

21/12/2018

El patronatu de la Fundación Asturiana d'Atención y Protección a persones con Discapacidaes y/o Dependencies (Fasad), presidíu pola conseyera de Servicios y Derechos Sociales, Pilar Varela, aprobó güei’l so plan d'actuaciones y el presupuestu pal añu viniente, que xube a 6,5 millones y va dexar atender a una población envalorada de 1.047 persones. Anguaño, la entidá empresta sofitu a 1.018.

Fasad xestiona cinco centros d’apoyu a la integración: La Arboleya, en Meres (Siero), Villalegre (Avilés), Les Arriondes, Candás y Navia; dos centros de día para persones mayores en Candás y Navia y otros dos pa mayores con discapacidá intelectual nel Fundoma (Uviéu) y Riañu (Llangréu). Tamién s'encarga de cinco recursos d'agospiamientu: la Unidá Residencial de Meres (Siero), el Centru d'Atención a la Dependencia de Turón (Mieres), la Unidá Residencial de Cangas, una vivienda tutelada pa persones con discapacidá intelectual n'Avilés y agospiamientu tutelar nel Fundoma.

Asina mesmo, supervisa a comuña cola Conseyería de Sanidá ocho viviendes destinaes a persones con enfermedá mental n'Uviéu, Avilés, Mieres y L.luarca, a les que van sumase otros dos nel 2019. Amás, desenvuelve dellos programes d’apoyu, como'l residencial p’afectaos por trestornos mentales graves n'Uviéu; el d’estimulación nel mediu acuáticu pa menores de 0 a 3 años, en collaboración coles Unidaes d'Atención Infantil Temprana, y el proyectu Mañana, también, d’apoyu a padres mayores de 60 años que tienen fíos discapacitaos al so cargu.

Otra manera, la fundación asume'l siguimientu de 469 persones incapacitaes xudicialmente, función que tien encamentada pola Alministración autonómica y que lleva alantre d’alcuerdu col decretu 21/2006, de 2 de marzu, que regula la constitución y el funcionamientu de la Comisión de Tuteles del Principáu.

 

Información sobre el documento

© Copyright 2006. Gobiernu del Principau d'Asturies