Gobiernu del Principau d'Asturies

Asturies, muncho más cerca

Tas en

Asturias.es Temes Economía y finances Barbón convida a los grupos parllamentarios a aunise na defensa ...
 

Economía y finances

Barbón convida a los grupos parllamentarios a aunise na defensa d’un sistema de financiación que garantice la equidá y tenga en cuenta’l declive demográficu

El presidente y la conseyera de Facienda lideren la primer reunión coles fuercies polítiques pa intentar consensuar una posición que respuenda a los intereses d’Asturies. El Gobiernu avisa de que la pérdiga de población nun pue suponer una mengua de recursos y reclama que’l modelu considere’l porcentaxe d’habitantes con más de 65 años

Un momento del acto

15/10/2019

El presidente del Principáu, Adrián Barbón, convidó güei a tolos grupos parllamentarios de la Xunta Xeneral a aunise na defensa d’un sistema de financiamientu autonómicu qu’asegure la equidá na prestación de servicios públicos en tol Estáu. El xefe del Gobiernu tamién reclamó que’l modelu nuevu tenga en cuenta l’impactu del declive demográficu, de manera que la pérdiga de población nun suponga una mengua de recursos.

Barbón y Ana Cárcaba, conseyera de Facienda, lideraron la primer reunión del Gobiernu d’Asturies coles fuercies parllamentaries. L’oxetivu del alcuentru -ún de los compromisos anunciaos pol presidente al principiu del so mandatu- ye alcordar una posición común énte la próxima revisión del modelu actual. La reforma, retardada en ocasiones socesives, ta pendiente dende’l 2015.

L’Executivu presentó un documentu que sintetiza los sos criterios esenciales. Ente ellos, que la negociación se trate de forma multillateral –esto ye, cola participación en pie d’igualdá de toles comunidaes- y busque el máximu consensu. El resultáu final tien que garantizar un nivel equivalente de servicios públicos (sanidá, educación, servicios sociales) a tola ciudadanía, con independencia del so llugar de residencia. Con esta posición, el Principáu aboga por reforzar la solidaridá y la cohesión interterritorial.

P’algamar estos fines, el Gobiernu d’Asturies considera que’l financiamientu tien que s’afitar a tenor del costu real de la prestación de los servicios, y non namás del númberu d’habitantes o la recaudación tributaria imputada a cada territoriu, como sostienen otres comunidaes. Pa calcular esi costu hai que considerar factores como l’avieyamientu de la población, segregando en mayor midida’l porcentaxe que supere los 65 años; l’encarecimientu que suponen les dificultaes orográfiques y la dispersión de la población y, amás, la repercusión del declive demográficu. Esta ye una de les novedaes principales na posición del Gobiernu del Principáu: como la natalidá baxa y el despoblamientu riquen un tratamientu específicu, la perda d’habitantes nun tien que suponer una mengua de recursos.

Otros criterios básicos pal Principáu son estos:

  • El modelu tien que se basar nes necesidaes de gastu, non na capacidá fiscal de cada territoriu. Tampoco nun se pue aplicar el llamáu principiu d’ordinalidá: el sistema nun tien que dar más recursos a determinaes comunidaes namás por tener más recaudación tributaria. Si non, delles diben privilexaes.
  • Ye imprescindible dotar al sistema de mayores recursos pa correxir los déficits de financiamientu xeneraos de la que tea vixente’l modelu actual. La realidá ye que nun existen territorios sobrefinanciaos. Al tiempu, ye menester garantizar el principiu de suficiencia, de manera que les comunidaes dispongan de los recursos precisos pa financiar los servicios de la so competencia tanto nel presente como nel futuru.
  • El sistema tien que responder a un criteriu de nivelación total. El Gobiernu d’Asturies refuga que’l modelu asegure namás determinaos servicios mentes dexa que na prestación d’otros, tamién importantes, haya diferencies ente territorios.
  • La reforma ha acompañase d’una revisión del sistema tributariu qu’incluya una harmonización de mínimos qu’acote la competencia ente comunidaes. De toles maneres, les rebaxes indiscriminaes d’impuestos tienen que tener impactu sobre los ingresos autonómicos. Y, igualmente, hai redefinise la recaudación normativa de los tributos vencíos, pa qu’a cada territoriu-y imputen los recursos que-y correspuendan, ensin que se sobreestimen los ingresos autonómicos.

Tanto’l presidente del Principáu como la conseyera de Facienda repitieron la so voluntá d’algamar un alcuerdu políticu ampliu que redunde en beneficiu de los intereses d’Asturies. Dambos resaltaron la importancia que tien el sistema de financiamientu p’asegurar la calidá de la sanidá, la educación y los servicios sociales, bases del Estáu de bienestar.

El Gobiernu d’Asturies va caltener, amás, la política d’aliances con otres comunidaes desenvuelta na llexislatura pasada pa proponer criterios comunes énte la reforma del sistema.

Información sobre el documento

© Copyright 2006. Gobiernu del Principau d'Asturies