Gobiernu del Principau d'Asturies

Asturies, muncho más cerca

Tas en

Asturias.es Sanidá impulsa’l papel de los farmacéuticos nos equipos ...
 

Aniciu

Sanidá impulsa’l papel de los farmacéuticos nos equipos asistenciales p’ameyorar la calidá del cuidáu a los pacientes

Estos especialistes revisen yá tolos tratamientos que reciben les persones ingresaes nel HUCA, un serviciu que se va ampliar a otres árees como les urxencies. “Queremos avanzar nesta llinia y afitar una Unidá de Xestión Clínica de Farmacia escelente”, asegura’l conseyeru Francisco del Busto

De izquierda a derecha: Dolores Escudero, responsable de la UCI del HUCA; Ana Lozano, directora de la Unidad de Gestión Clínica de Farmacia del HUCA; Luis Hevia, gerente del área sanitaria IV, y el consejero de Sanidad, Francisco del Busto

12/02/2018

La Conseyería de Sanidá va potenciar la figura de los farmacéuticos dientro de los equipos multidisciplinares d’atención al paciente, cola mira d’ameyorar la calidá del cuidáu sanitariu y los sos resultaos. Con esti fin programóse güei n’Hospital Universitariu Central d’Asturies (HUCA) la xornada Integración del farmacéuticu hospitalariu nes unidaes clíniques qu’inauguró’l conseyeru de Sanidá, Francisco del Busto.

L’oxetivu de la iniciativa ye identificar el valor que dan estos profesionales a los equipos y tamién les sos responsabilidaes, tanto a nivel asistencial como docente y investigador-innovador. Pa llogralo, va cuntar cola opinión de los médicos, que van definir el sofitu que precisen de los farmacéuticos p’ameyorar la so práctica clínica. Amás, va tomase como referencia la esperiencia d’Estaos Uníos, onde los profesionales de farmacia yá tán integraos nestos grupos.

El conseyeru de Sanidá aseguró que l’atención a los problemes de salú, sobre manera aquellos más complexos, que riquen de la conocencia de diversos especialistes y del manexu de terapies nueves, “demanda cada vez más un intercambéu de saber y esperiencies ente integrantes d’amplios equipos multidisciplinares”. “Esi ye’l camín nel que tenemos d’avanzar, cuntando colos meyores especialistes de l’atención farmacéutica, profesionales qu’añeden valor al procesu asistencial y que promueven l’usu efectivu, seguru y eficiente de los medicamentos nun marcu d’asistencia integral y continua”, sorrayó.

 

Avances nel HUCA

Nesi contestu convocóse la xornada de güei, que tien por finalidá avanzar nesa llinia d’atención al paciente p’afitar una Unidá de Xestión Clínica de Farmacia escelente y con mayor presencia de farmacéuticos dientro de los equipos asistenciales.

L’HUCA lleva yá meses dando pasos nesti sentíu. Asina, aumentóse la dotación de profesionales con un farmacéuticu más pa l’atención a los pacientes con patoloxíes complexes de dispensación hospitalaria que recueyen la so medicación nel mesmu centru. Amás, aspírase a incorporar a otru más na validación y monitorización de los tratamientos de los hospitales de día.

Anguaño, tolos tratamientos que reciben los pacientes hospitalizaos son revisaos por farmacéuticos especialistes y va avanzase nesta llinia pa que los enfermos que vaigan a los servicios d’urxencies dispongan tamién d’un profesional qu’asegure la melecina correcta, nel momentu oportunu y nuna dosis afayadiza. El llabor tamién va implicar asesorar al restu del equipu pa consiguir el meyor tratamientu pa cada usuariu. Amás, a partir d’esti añu va incorporase la rotación d’un residente de farmacia hospitalaria a esti serviciu.

A pidimientu de los mesmos profesionales de les unidaes de cuidaos intensivos (UCI), el sistema va estendese pasu ente pasu a estes árees, que van llegar a cuntar con un farmacéuticu de plantiya. L’oxetivu final ye que’l paciente, cuando llega al hospital, cunte con un farmacéuticu de referencia, igual qu’agora tien al so médicu o a la so enfermera. 

   Icono gráfico alusivo al tipo de archivo Audiu (Audiu: 689 Kb) (n'español)

Información sobre el documento

© Copyright 2006. Gobiernu del Principau d'Asturies