Gobierno del Principado de Asturias

Asturias, mucho más cerca

Estás en

Aniciu El Gobiernu d'Asturies avanza na simplificación alministrativa ...
 

Aniciu

El Gobiernu d'Asturies avanza na simplificación alministrativa nel sector del xuegu

11/09/2017

 

-   La Conseyería de Presidencia prepara dos normatives sobre l'autorización d'un tipu nuevu de bingu y una regulación nueva pa les máquines d'azar de tipu C

 

-   Coles disposiciones nueves, el Principáu pondría en marcha'l 85 % del desenvolvimientu reglamentariu de la llei aprobada nel 2014

 

 

El Gobiernu d'Asturies va suprimir la esixencia de cuntar con un documentu profesional pa desenvolver l'actividá profesional n'empreses de xuegu y apuestes. Con esta decisión, l'Executivu busca suprimir les cargues alministratives y económiques que tienen d'encarar la patronal y los trabayadores del sector.

 

Ésta ye una de les trés disposiciones nueves nes que trabaya na actualidá la Conseyería de Presidencia y Participación Ciudadana, pente medies del serviciu del Xuegu adscritu a la Dirección Xeneral d'Interior nueva, y que, desque tean remataes, van dexar algamar un grau de cumplimientu del 85 % na normativa autonómica sobre esta materia.

 

Los otros dos asuntos nos que trabaya'l Gobiernu son:

 

    Una resolución que va dexar el desenvolvimientu del bingu deriváu nel Principáu, una modalidá nueva d'esti xuegu con autorización pa la emisión de cartones virtuales a los operadores.

 

    Una resolución pola que s'afiten les condiciones técniques d'homologación y funcionamientu, asina como los precios de les partíes y premios, de les máquines de tipu C o d'azar instalaes en casinos. Con esti cambéu pretende equiparase la regulación asturiana a la esistente n'otres comunidaes autónomes y atender a les demandes de los operadores y de los de los fabricantes de máquines.

 

Estes disposiciones nueves van complementar los desenvolvimientos normativos publicaos dende l'aprobación de la Llei del Xuegu nel 2014. De magar, punxéronse en marcha la regulación del Conseyu del Xuegu, el cambéu del reglamentu de casinos pa l'autorización d'una sala apéndiz n'Uviéu y un decretu que dexa la modalidá del xuegu d'apuestes nel Principáu.

 

Con estes trés acciones, anguaño en tramitación, namás van quedar pendientes otros trés desenvolvimientos de la llei, que la so aprobación va concretase desque se disponga de normativa básica estatal. Trátase del rexistru d’interdicciones d'accesu al xuegu o rexistru de prohibíos; la regulación de la publicidá, el patrociniu y la promoción en materia de xuegu y apuestes, y la regulación del rexistru xeneral nel que s'inscriben toles empreses autorizaes.

 

Tocante a la ellaboración d'un plan de prevención de la ludopatía, tal qu’establez la disposición adicional tercera de la llei del 2014, el Gobiernu asturianu caltién el so compromisu d'ellaborar un programa específicu sobre xuegu patolóxicu a lo llargo d'esta llexislatura en collaboración coles empreses asturianes del sector, el Conseyu de la Mocedá, y l'asociación d'afectaos Larpa.

 

 

Información sobre el documento

© Copyright 2006. Gobierno del Principado de Asturias