Gobiernu del Principau d'Asturies

Asturies, muncho más cerca

Tas en

Asturias.es La Llei de Derechos y Prestaciones Vitales va cubrir les ...
 

Aniciu

La Llei de Derechos y Prestaciones Vitales va cubrir les necesidaes básiques de les persones que vivan n’ Asturies

L'aprobación de la norma va dexar impulsar el salariu social básicu y entainar la tramitación de la prestación. La norma recueye un complementu específicu para les persones que viven soles y perciben una pensión non contributiva. El proyectu lexislativu optimiza la collaboración y la coordinación ente les alministraciones públiques

21/02/2020

El proyectu de Llei de Garantía de Derechos y Prestaciones Vitales va cubrir les necesidaes básiques de persones que vivan n’Asturies, según aseguró esta mañana na Xunta Xeneral la conseyera de Derechos Sociales y Bienestar, Melania Álvarez. “Propunximos entornar tolos esfuerzos n'entainar la respuesta del nuestru departamentu a los problemes de la ciudadanía. Problemes que, especialmente nesta conseyería, tienen cares, nomes y apellíos”, destacó.

Melania Álvarez compareció nel parlamentu, acompañada pol so equipu directivu, para informar sobre'l proyectu de llei. El testu yá fuera unviáu a la Xunta l'anterior llexislatura, pero nun pudo llegar a aprobase por falta de tiempu. L'actual Executivu volvió tramitalo en payares. Foi'l primer proyectu de llei aprobáu esti mandatu, amuesa de la prioridá que'l Gobiernu d'Asturies concede a l'axenda social.

La Llei de Garantía de Derechos y Prestaciones Vitales va entrar a valir na so totalidá nel plazu d'un añu dende la so aprobación. Ente otros oxetivos, va consolidar el salariu social con midíes que van entainar esta prestación, exenciones pa los ingresos provenientes del trabayu y de determinaes pensiones, y l'actualización de los programes personalizaos d'incorporación social y llaboral amestaos a la percepción d'esta renta básica.

El testu inclúi dellos complementos vitales pa les persones más precisaes, mesmo que midíes de sofitu pa situaciones de discapacidá o dependencia, pa impulsar l'accesu a viviendes públiques en réxime d'arriendu y pa families d'acoyida. Otra de les novedaes ye que recueye l'aplicación d'un complementu específicu pa les persones que viven soles y perciben una pensión non contributiva.

La conseyera concretó que la llei va facilitar la incorporación social y llaboral de quien s'atope en situaciones de vulnerabilidá, por aciu la creación d'un Sistema Asturianu de Garantía de Derechos y Prestaciones Vitales, cola collaboración y participación de les entidaes locales.

El testu tamién garantiza unos mínimos comunes en tol territoriu en relación coles ayudes d'emerxencia social que conceden los conceyos y pon especial énfasis na atención a la infancia, mesmo que nos sofitos pal accesu y caltenimientu na vivienda y contra la probeza enerxética.

El proyectu optimiza la collaboración y la coordinación ente les alministraciones públiques competentes pa garantizar asina un mínimu común d'atención en toa Asturies. Pa ello, va establecer un nuevu mecanismu de financiación acorde a esti fin y un sistema d'información que respuenda a los criterios d'eficiencia, axilidá, oxetividá, participación y serviciu al interés social

El testu cuntó pa la so aprobación col vistu bonu del Conseyu Asesor de Bienestar Social y de la Comisión Asturiana d'Alministración Local. Na so fase de tramitación foi presentáu a los axentes sociales nel ámbitu de la concertación, a los grupos parlamentarios, a la comisión executiva de la Federación Asturiana de Conceyos (FACC) y a les entidaes del tercer sector. Coles mesmes, foi arriquecíu con delles de les alegaciones recibíes na fase d'información pública.

Icono gráfico alusivo al tipo de archivo Audiu (Audiu: 783 Kb) (n'español)

Información sobre el documento

© Copyright 2006. Gobiernu del Principau d'Asturies