Gobiernu del Principau d'Asturies

Asturies, muncho más cerca

Tas en

Asturias.es La Fiesta del Asturcón recibe la reconocencia d'interés ...
 

Aniciu

La Fiesta del Asturcón recibe la reconocencia d'interés turísticu nacional que tienen yá siete celebraciones asturianes

La Secretaría d'Estáu de Turismu concedió la distinción al festexu de Piloña depués de trenta años ensin nueves incorporaciones nel Principáu

18/07/2019

La Secretaría d'Estáu de Turismu del Gobiernu d'España concedió'l títulu de Fiesta d'Interés Turísticu Nacional a la Fiesta del Asturcón, la séptima celebración del Principáu en recibir esta declaración. El director xeneral de Comerciu y Turismu, Julio González Zapico, informó esta mañana de la resolución adoptada ayeri y valoró la “gran noticia p'Asturies, pa Piloña y pa los amantes d'esta raza autóctona”.

Zapico aseguró tamién que la reconocencia “supón un respaldu de primer nivel a esta fiesta y al llabor de colectivos como l'Asociación Conservadora d'Asturcones del Sueve, que dende 1980 entama la celebración en collaboración col Conceyu de Piloña”.

La Fiesta del Asturcón, declarada Fiesta d'Interés Turísticu del Principáu d'Asturies en 1994, celébrase'l tercer sábadu d'agostu na mayada de Espineres. El so principal oxetivu ye dar a conocer y averar a la población el caballu asturcón, mesmo que rindir homenaxe a tolos que participen nel caltenimientu y promoción d'esta raza autóctona. Unu de los sos principales valores anicia en que dexa contemplar sobre'l terrén ónde y cómo se desenvuelve la vida d'estos animales, que tol añu pastien n'estáu de semilibertá y caltienen les cualidaes y la pureza que los caracteriza.

La candidatura realizada anguaño pola Asociación Conservadora d'Asturcones del Sueve (ACAS) pal llogru del títulu de Fiesta d'Interés Turísticu Nacional cuntó cola collaboración de la Dirección Xeneral de Turismu, “daqué ineludible y fundamental pa llograr esti títulu, que vuelve reconocer a una fiesta asturiana dempués de 30 años”, señaló Zapico.

Al pie de la Fiesta del Asturcón de Piloña, cunten cola distinción el Día d'Asturies (Xixón), la Fiesta de la Virxe de La Guía (Llanes), el Festival de la Sidra Natural (Nava), el Descensu a nadu de la Ría de Navia (Navia), el Día d'América n'Asturies (Uviéu) y La nuestra Señora del Rosario (L.luarca).

 

Información sobre el documento

© Copyright 2006. Gobiernu del Principau d'Asturies