Gobiernu del Principau d'Asturies

Asturies, muncho más cerca

Tas en

Asturias.es El TSXA avala la normativa de Desenvolvimientu Rural sobre la ...
 

Aniciu

El TSXA avala la normativa de Desenvolvimientu Rural sobre la campaña d’arrinque d’ocle frente al recursu de la cofradería de Llastres

La sentencia considera que la resolución de xunu del 2017 ye axustada a derechu y impón les costes a la entidá recurrente

09/07/2018

La sala de lo contencioso alministrativo del Tribunal Superior de Xusticia del Principáu d’Asturies (TSXA) avala la normativa de la Conseyería de Desenvolvimientu Rural, de 9 de xunu del 2017, sobre la campaña d’estracción d’ocle de fondu d’esi añu, recurrida pola Cofradería de Marineros Santa María de Sábada, de Llastres.

Na sentencia, fechada’l 29 de xunu del 2018, el tribunal sofita los criterios de xestión y la forma de tramitación d’esa campaña d’ocle, niega que se vulneraren los principios constitucionales d’igualdá y llibertá d’empresa y sostién que nun hubo esviación de poder na aplicación de la resolución “al nun existir siquier nicios de la existencia de la mesma”.

La cofradería de Llastres interpunxo un recursu contra la resolución argumentando la esclusión de dalgún de los sos barcos, la participación d’embarcaciones de Ribeseya, l’establecimientu d’un censu zarráu de buques y los criterios usaos pol Principáu al escoyer los participantes. El secretariu de la cofradería llegó a acusar de prevaricación a la conseyera de Desenvolvimientu Rural y Recursos Naturales, María Jesús Álvarez, y al director xeneral de Pesca Marítima, Alberto Vizcaíno.

El fallu acreíta la resolución de Desenvolvimientu Rural por ser axustada a derechu, con imposición espresa de costes a la cofradería.

Esta sentencia coincide col autu de 3 de xunetu del 2017, de la mesma sala de la TSXA, pol que se llevantaben les midíes cautelarísimes impuestes depués del recursu interpuestu pola Agrupación de Vecinos y Amigos de Llanes (AVALL) contra la mesma resolución.

Naquella ocasión, l’autu sofitábase na existencia de 23 informes técnicos qu’avalaben la inocuidá del arrinque d’ocle, ensin qu’AVALL fixere “aportación técnica dalguna”, consideraba que los trámites efectuaos na ellaboración de la norma foren los llegalmente esixíos y criticaba que la mayor parte de la normativa alegada pol recurrente nun yera d’aplicación nel ámbitu espacial y material onde se desenvuelve esta actividá.

La Dirección Xeneral de Pesca Marítima difundió la sentencia ente les cofraderíes, aportunando nes sos declaraciones “en rellación cola busca d’instrumentos xurídicos pa dir en contra de los que, sofitándose na gratuidá de la xusticia, traten d’entorpecer el desempeñu d’una actividá profesional como l’arranque d’algues, a pesar de conocer el rigor col que se regulen les campañes y l’estrictu siguimientu técnicu y científicu de les mesmes”, manifestó Alberto Vizcaíno.

 

 

Información sobre el documento

© Copyright 2006. Gobiernu del Principau d'Asturies