Gobiernu del Principau d'Asturies

Asturies, muncho más cerca

Tas en

Asturias.es La osezna Saba, treslladada a un espaciu en semillibertá nel ...
 

Aniciu

La osezna Saba, treslladada a un espaciu en semillibertá nel monte lleonés de Valsemana p’ avanzar hacia la so reintroducción nel mediu natural

El plantígrado, qu’agora pesa 23 kilos, alcuéntrase yá nesti recintu ampliau, aislláu y alloñáu d'actividaes humanes. L’esbardu foi recoyíu a finales de mayu nos alredores de la corralada de Proaza y unviáu depués al Centru de Recuperación de la Fauna Montesa de Cantabria

17/09/2019

La cría d'osu pardu cantábricu recoyida a finales de mayu nos alredores de la corralada de Proaza foi treslladada ayeri a un recintu en semillibertá nel monte de Valsemana, en Llión, dependiente de la Conseyería de Fomentu y Mediu Ambiente de la Xunta de Castiella y Llión. Dende'l pasáu mes de xunu atópase nel Centru de Recuperación de la Fauna Montesa del conceyu de Villaescusa, perteneciente a la Conseyería de Mediu Rural, Pesca y Alimentación del Gobiernu de Cantabria.

Los equipos técnicos y veterinarios del Principáu, el Gobiernu de Cantabria y la Xunta de Castiella y Llión, col sofitu del Ministeriu pa la Transición Ecolóxica, consensuaron el treslláu de la osa al recintu lleonés, una vegada superáu'l cuadru neurolóxicu que carecía y en sometiéndola a un chequéu refechu.

Les instalaciones de Valsemana van facilitar l'aclimatación del animal al mediu natural de forma previa a la so reintroducción, al tar aisllaes, son amplies y cunten con una afayadiza bayura ambiental. El treslláu a esti recintu realizóse ensin incidencies.

La Guardería de Mediu Natural del Principáu, en collaboración con técnicos especializaos, recoyó a la cría nos alredores de la corralada osera de Proaza. Carecía desnutrición, deshidratación y alteraciones neurolóxiques, polo que foi unviada a un centru veterinariu pa estabilizala. N'esperimentando un leve ameyoramientu, alcordóse'l so treslláu al Centru de Recuperación de la Fauna Montesa, en Cantabria, unes instalaciones específiques pal tratamientu d'osos pardos.

Nos trés meses que permaneció ellí tuvo permanentemente baxo control especializáu, anque ensin contactu visual colos sos cuidadores, y algamó un desenvolvimientu óptimu, hasta llegar a los 23 kilogramos de pesu.

 

Información sobre el documento

© Copyright 2006. Gobiernu del Principau d'Asturies