Gobiernu del Principau d'Asturies

Asturies, muncho más cerca

Tas en

Asturias.es Temes Agricultura y montes Sanidá Vexetal El plazu de solicitú d’ayudes pa lluchar contra la vecería de ...
 

Sanidá Vexetal

El plazu de solicitú d’ayudes pa lluchar contra la vecería de los pumares de sidra acaba’l llunes que vien

Los fondos, que xuben a 160. 000 euros, tán asociaos al plan esperimental pa controlar la producción del Principáu y la Denominación d’Orixe Protexida Sidra d’Asturies

20/03/2019

El plazu pa solicitar les ayudes pa lluchar contra la vecería de los pumares de sidra acaba’l llunes que vien, 25 de marzu. Los fondos, que xuben a 160.000 euros, tán asociaos al programa esperimental pal control de la producción y respuenden a los alcuerdos adoptaos na Mesa de la Mazana, que güei celebró una xunta n’Uviéu cola presencia de la directora xeneral de Desenvolvimientu Rural y Agroalimentación, María Jesús Aguilar.

El Principáu punxo en marcha’l programa en collaboración col conseyu regulador de la Denominación d’Orixe Protexida (DOP) Sidra d’Asturies, entidá que va xestionar tanto la solicitú como l’ayuda económica p’aplicar les midíes correspondientes nes finques de los productores. Estes acciones básense en práctiques culturales probaes, como l’aclariáu, fundamental pa lluchar contra l’alternancia nes colleches.

Con estes ayudes búscase que “los mazaneros interesaos n’estabilizar la so producción puedan establecer alcuerdos de compra colos llagareros, de tala forma que la mazana producío n’Asturies suponga una solución pal sector y non un problema”, destacó la directora xeneral.

Amás, Aguilar sorrayó que la vecería “ye un problema de primer orde nel sector productor de mazana y nel ellaborador de sidra pola oscilación tan fuerte de les producciones, un desequilibriu que supón problemes asociaos al suministru y el financiamientu”.

Asina, esplicó que nos años impares, de sobreproducción, prodúcense daños físicos na estructura del árbol y una mengua del calibre y la calidá de los frutos, mentes que nos pares nun hai abonda materia prima asturiano pa la so tresformación pola industria sidrera, lo qu’obliga a importar frutos con característiques distintes a los autóctonos. “Esta situación compromete la homoxeneidá, característiques y calidá del productu final, de la que provoca oscilaciones fuertes de precios de la mazana a tenor del orixe y magnitú de les colleches”, amestó.



Un máximu de 700 euros por hectárea y de 3.500 por titular

Los productores qu’accedan a les ayudes van recibir una cantidá máxima de 700 euros por hectárea y de 3.500 euros por titular, con una superficie tope de cinco hectárees.

Ente les obligaciones de los productores que participen nel programa esperimental, figura tamién l’usu de determinaos productos pa realizar l’aclariáu de los árboles.

Nos últimos años la superficie destinada a la producción de mazana de sidra amparao pola DOP nun dexó de medrar, sobre manera nel 2017, cuando remató’l procesu d’incorporación de 54 variedaes nueves de mazana. Anguaño, la superficie dedicada a sidra con denominación d’orixe ye de 879 hectárees, correspondientes a 328 productores y 32 llagares.

 

Información sobre el documento

© Copyright 2006. Gobiernu del Principau d'Asturies