Gobiernu del Principau d'Asturies

Asturies, muncho más cerca

Tas en

Asturias.es Temes Vivienda El Gobiernu d'Asturies va ufiertar les viviendes nueves de ...
 

Vivienda

El Gobiernu d'Asturies va ufiertar les viviendes nueves de Pumarabule a los vecinos en réxime de compra o arriendu

La conseyera de Derechos Sociales y Bienestar anuncia que los pisos van poder apurrise'l branu próximu. Los propietarios qu'habiten anguaño les 19 cases más deterioraes van tener prioridá para optar a los nuevos inmuebles

24/07/2020

El Gobiernu d'Asturies va ufiertar a los vecinos les 36 viviendes nueves edificaes en Pumarabule (Carbayín Baxu) en réxime de compra o arriendu. La conseyera de Derechos Sociales y Bienestar, Melania Álvarez, informó güei sobro esta decisión mientres l'alcuentru que caltuvo con representantes de l'asociación de vecinos de La Malpica y el director xeneral de Vivienda, Fermín Bravo.

Álvarez tamién señaló que los pisos podríen apurrise'l branu próximu y esplicó les condiciones nes que podrá aportase a ellos. Asina, técnicos de la Dirección Xeneral de Vivienda analizaron l'estáu de les edificaciones actuales y establecieron que 19 d'elles sufren un deterioru mayor. Énte esta circunstancia, los sos propietarios van tener preferencia p'aportar a los inmuebles de nueva construcción.

En primer instancia, van ser les persones con una vivienda en propiedá les que van poder solicitar l'accesu a una nueva. Amás, en casu de que dalguna quede llibre, va ponese a disposición de quien more anguaño en réxime d'arriendu.

El preciu, tanto nel casu de la compra como del arriendu, yá ta reguláu pola normativa vixente. Si optar pola adquisición del inmueble, va rexise polos precios de vivienda de promoción pública, qu'en Siero tán afitaos en 1.270 euros por metro cuadráu de superficie útil pa los pisos y en 762 por metro pa garaxes y trasteros.

“A aquelles persones que merquen una vivienda nueva va descontáse-yos el preciu del inmueble antiguu según tasación oficial, y les qu'opten pol réxime d'arriendu n'unu de los inmuebles nuevos van caltener la propiedá antigua”, apuntó la conseyera.

El costu del arrendamientu d'una vivienda nueva tamién ta reguláu por normativa, polo que cada inquilín va pagar añalmente'l 4% del preciu total del inmueble.


Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies