Influenza aviar o “gripe aviar”

Les midíes específiques de llucha contra la enfermedá tán regulaes pola Orde APA/2442/2006, de 27 de xunetu, pola que s’establecen midíes específiques de protección sobre la influenza aviar.

N’España hai un Programa Nacional de Vixilancia d´Influenza Aviar basáu nel riesgu, con un componente de vixilancia activa y pasiva n’aves doméstiques y sobre manera de vixilancia pasiva en fauna montesa. 

Pa más información sobre la influenza aviar: ver la páxina del MAPA

Midíes de bioseguranza d’aplicación n’Asturies

1- Suspéndense dende´l 22 d´ochobre del 2025 y hasta´l 31 d´avientu del 2025 (inclusive) toles feries, concursos, certámenes, puyes, mercaos y cualquier eventu o concentración d´animales, nel ámbitu territorial de la Comunidá Autónoma del Principáu d’Asturies. https://miprincipado.asturias.es/bopa/2025/10/22/20251022Su1.pdf

2.- Dende’l 10 de payares del 2025 (incluido), cola activación de la Orde APA/2442/2006, nos conceyos de Castropol, Corvera, Xixón, Gozón, Ribeseya, Tapia, A Veiga y Villaviciosa (ZONES DE RIESGU Y VIXILANCIA ESPECIAL –ZEV–) van aplicase estes midíes de bioseguranza de calter obligatoriu tanto pa les esplotaciones avícoles rexistraes como pa los gallineros d’autoconsumu:

• Queda prohibida la utilización d’aves de les órdenes Anseriformes (coríos, oques, gansos, cisnes, etc.) y Charadriiformes (gaviluetes, chorlos, etc.) como señuelu.
• Queda prohibida la cría de coríos y gansos con otres especies d’aves de corral.
• Queda prohibida la cría d’aves de corral nel esterior. Sicasí, si nun ye posible, autorízase’l caltenimientu d’aves de corrala al aire llibre usando teles payareres o cualquier otru dispositivu que torgue la entrada d’aves monteses, y siempre que s’alimente y abebiente a les aves nel interior de les instalaciones o nun sitiu que torgue la llegada d’aves monteses y evite’l contactu d’elles colos alimentos o l’agua destinaos a les aves de corral.
• Prohíbese dar agua a les aves de corral procedente de depósitos d’agua a los que puedan llegar aves monteses, sacante en casu de que se trate esa agua pa garantizar la inactivación de posibles virus d’influenza aviar.
• Los depósitos d’agua asitiaos nel esterior por motivos de bienestar animal pa determinaes aves de corral habrán tener protección abondo contra les aves acuátiques silvestres.
• Queda prohibida la presencia d’aves de corral o otru tipu d’aves cautives nos centros de concentración d’animales, incluyendo certámenes ganaderos, muestres, exhibiciones y celebraciones culturales, amás de cualquier concentración d’aves de corral o otru tipu d’aves cautives al aire llibre. Nun se van considerar como aves cautives les calteníes n’establecimientos autorizaos pa la so venta como aves de compañía nin aquelles aves de corral calteníes nun establecimientu comercial pa la so venta posterior a particulares. Esti Serviciu de Sanidá y Producción Animal va poder autorizar determinaes concentraciones de aves depués d’una evaluación de riesgu favorable.
• Los Servicios Veterinarios Oficiales van poder realizar nes esplotaciones y recintos con aves visites de control sanitariu y análisis periódicos.

3.- Nesos conceyos y nel restu d´Asturies: encamiéntase a los titulares, propietarios, criadores o personal al serviciu d’instalaciones d’animales cautivos, tanto d’esplotaciones ganaderes avícoles industriales como de gallineros d’autoconsumu allugaos n’Asturies, a reforciar les midíes de bioseguranza (sobre manera aquelles destinaes a evitar el contactu con aves monteses) y notificar ensin demoranza a les autoridaes competentes de Sanidá Animal del Principáu d’Asturies (Servicios Veterinarios Oficiales de les Oficines Comarcales Agraries).

4.- Nel casu de les aves monteses (sobre manera, marines): encamiéntase a tola ciudadanía a comunicar a los Axentes del Mediu Natural (112) si se producen mortalidaes anormales o s’atopen aves con síntomes clínicos o muertes,  EVITANDO’L CONTACTU CON ELLES.

• Circular sobre les midíes de bioseguranza influenza aviar n´Asturies (OCH -PAY 2025)