Alimentación animal
L’alimentación animal constituye un esllabón esencial na cadena alimentaria, con trescendencia bien grande pa garantizar la seguranza alimentaria, nel que confluyen munches actuaciones alministratives asociaes al consumu de piensu, ente les que pue destacase’l rexistru y l’autorización d’establecimientos y la comunicación de riesgos ente les autoridaes competentes asociaes al consumu de piensu.
A esti respective, el Reglamentu (CE) 183/2005, del Parllamentu Européu y del Conseyu, de 12 de xineru del 2005, pol que s’afiten requisitos en materia d’hixene del piensu, establez munches obligaciones pa los operadores d’empreses productores, comercializadores y tresportistes de piensu, amás de pa los llabradores nes sos actividaes d’alimentación d’animales destinaos a la producción d’alimentos. Esti Reglamentu (CE) 183/2005 dispón la obligación de llevar el rexistru d’establecimientos del sector de l’alimentación animal nel so artículu 9.3.
El Real Decretu 629/2019, de 31 d’ochobre, pol que se regula’l rexistru xeneral d’establecimientos nel sector de l’alimentación animal, les condiciones d’autorización o rexistru d’esos establecimientos y de los puntos d’entrada nacionales, l’actividá de los operadores de piensu, y la Comisión nacional de coordinación en materia d’alimentación animal establez la clasificación de los establecimientos d’empreses de piensu, según se precise una autorización previa o una comunicación previa pa empezar l’actividá.
La obligación de solicitar autorización o comunicar l’empiezu de l’actividá afecta tamién a los tresportistes de piensu, tanto a granel como envasao.
De la mesma manera, el Real Decretu indica que los establecimientos d’empreses alimentaries que destinen subproductos como materia prima a alimentación animal (sacante minoristes y les incluyíes nes secciones I a VIII, XI, XIII, XIV y XV del anexu III del Reglamentu (CE) n.u 853/2004 si destinen tolos subproductos de categoría 3 a plantes que realicen actividaes intermedies o a plantes de tresformación tal como se definen n’anexu I del Reglamentu (UE) n.u 142/2011 o a fábriques d’alimentos p’animales de compañía) van quedar quitos de la inscripción nel Rexistru Xeneral d’Establecimientos nel Sector de l’Alimentación Animal (SILUM). Sicasí, esa actividá tien que se reflexar nel rexistru al que se refier el Real Decretu 191/2011, sobre’l Rexistru Xeneral Sanitariu d’Empreses Alimentaries y Alimentos (RXSEAA), siendo menester que l’operador responsable presente una comunicación previa al empezar l’actividá énte l’Autoridá Competente.
Obligaciones de los operadores de piensu
- Amás de les obligaciones establecíes nel Reglamentu (CE) 183/2005, del Parllamentu Européu y del Conseyu, los operadores de piensu han caltener los documentos y rexistros de datos a los que fai referencia’l reglamentu mentáu un mínimu de trés años, ensin perxuiciu de qu’otra normativa específica marque un periodu de tiempu mayor.
- Nel casu de los establecimientos de piensu que seyan fabricantes de piensu compuesto, piensu medicamentoso, aditivos o premezcles, los operadores de piensu allugaos nel Principáu d’Asturies han unviar primero del 31 de xineru de cada añu los datos relativos a les cantidaes de los productos fabricaos, amás de la cantidá de les materies primes, aditivos, premezcles, medicación veterinario y productos usaos, referíos al añu precedente. Esta información ha mandase en formatu electrónicu al traviés de la ficha: Declaración anual de fabricantes de piensu compuesto (DECO0069T01)
- Los operadores d’empreses de piensu han comunicar a l’autoridá competente’l cese en dalguna de les sos actividaes, amás de cualquier modificación de los sos datos nel plazu máximu d’un mes desque se produza la modificación. Nel casu d’empezar una actividá nueva, ha presentase una solicitú axuntando la documentación que demuestre la capacidá pa dedicase a actividaes que complementen o reemplacen aquelles pa les que foi rexistráu o autorizáu de mano.
- L’operador de piensu va ser responsable de caltener la documentación que xustifique’l rexistru o autorización de cada establecimientu que conforme la empresa de piensu.
Llexislación aplicable
- Reglamentu (CE) 183/2005, de 12 de xineru de 2005, pol que s’afiten requisitos en materia d’hixene del piensu.
- Real Decretu 629/2019, de 31 d'ochobre, pol que se regula’l rexistru xeneral d’establecimientos nel sector de l’alimentación animal, les condiciones d’autorización o rexistru d’esos establecimientos y de los puntos d’entrada nacionales, l’actividá de los operadores de piensu, y la Comisión nacional de coordinación en materia d’alimentación animal.
- Decretu 71/2000, de 5 de setiembre, pol que se regula l’autorización y rexistru d’establecimientos y intermediarios del sector de l’alimentación animal del Principáu d’Asturies.
- Reglamentu (UE) 2019/4, de 11 d'avientu de 2018, tocante a la fabricación, la comercialización y l’usu de piensu medicamentoso.
- Real Decretu 370/2021, de 25 de mayu, pol que s’establecen disposiciones específiques pa l’aplicación n’España del Reglamentu (UE) 2019/4, del Parllamentu Européu y del Conseyu, de 11 d’avientu del 2018, relativu a la fabricación, la comercialización y l’usu de piensu medicamentoso.
- Real Decretu 496/2024, de 21 de mayu,
pol que se dicten disposiciones pa l’aplicación n’España de la normativa de la Unión Europea relativa a l’alimentación d’animales de granxa con delles clases de piensu d’orixe animal.