Ley de impulso demográfico

Esta llei tien como oxetivu principal encarar el retu demográficu n’Asturies, una rexón qu’encara un avieyamientu poblacional fuerte, natalidá baxa, despoblamientu rural y desequilibrios territoriales. La norma establez un marcu llegal pa coordinar polítiques públiques, fomentar la cohesión social y territorial, y promover el desenvolvimientu sostenible y la igualdá.

Llei del Principáu d’Asturies 2/2024, de 30 d’abril, d’Impulsu Demográficu

Exes principales d’actuación

  1. Fomentu de la natalidá y apoyu a les families. La llei prioriza midíes pa incrementar la natalidá con sofitos económicos, servicios y polítiques que faciliten la conciliación de la vida llaboral, personal y familiar.
  2. Atracción y torna de población. Incluye actuaciones pa favorecer el regresu de la población emigrada y incentivar la llegada de residentes nuevos, fortaleciendo asina la medría poblacional.
  3. Accesu a la vivienda. L’accesu a vivienda asequible —sobre manera pa xente mozo y families— constituye una exa clave, con polítiques destinaes a facilitar l’asentamientu en tola rexón, incluyíes zones rurales.
  4. Garantía y meyora de los servicios públicos nel territoriu. La llei busca asegurar la prestación de servicios esenciales n’árees amenaciaes pola despoblación, reforciando la cohesión territorial y evitando la perda de población.
  5. Impulsu económicu y llaboral. Incluye midíes de sofitu al emplegu, al emprendimientu y a l’actividá económica, sobre manera n’entornos rurales, pa facer sostenible la permanencia de la población.
  6. Igualdá d’oportunidaes y cohesión social. Pon atención especial a muyeres, xente mozo y colectivos vulnerables, garantizando que les polítiques públiques contribuyan a la igualdá y al equilibriu demográficu.
  7. Enfoque tresversal y estratéxicu. La llei crea una Estratexa Demográfica del Principáu d’Asturies, obligando a que toles polítiques públiques tengan en cuenta’l so impactu na demografía, reforciando asina la coordinación ente conseyeríes.

Plan Demográficu del Principáu d’Asturies

El Plan Demográficu 2017–2027 ye la estratexa del Gobiernu del Principáu pa encarar trés retos principales:

  • L’avieyamientu poblacional
  • La baxa natalidá y el relevu xeneracional escasu
  • Los desequilibrios territoriales tan fuertes ente’l centru y les ales d’Asturies. El documentu parte d’un diagnósticu claru: el 4 % del territoriu concentra cerca del 55 % de la población, lo qu’obliga a diseñar polítiques que fomenten la cohesión territorial y una medría sostenible.

El plan estructúrase en 7 exes, 23 llinies d’actuación, 49 midíes y 218 acciones, configurando una estratexa integral pa revertir les tendencies demográfiques negatives.

Exes estratéxiques y midíes principales

1. Dinamización económica y TIC. Esta exa quier fortalecer la economía asturiana y impulsar condiciones que faciliten el caltenimientu y l’atracción de población.

2. Igualdá d’oportunidaes, conciliación y corresponsabilidá pa la familia, cola mira de facilitar que les families puedan tener los fíos que quixeren gracies a meyores condiciones de conciliación.

3. Avieyamientu. Trátase d’ún de los grandes retos d’Asturies, con midíes destacaes como’l refuerciu de l’asistencia en casa, ampliación de la cobertura de centros de día pa persones mayores, programes de voluntariáu senior y fomentu del intercambiu interxeneracional de conocimientu.

4. Relevu xeneracional. Busca compensar l’avieyamientu con incentivos qu’impulsen la natalidá.

5. Política migratoria. Esta exa impulsa la llegada y vuelta de población, clave pa permediar la estructura demográfica.

6. Reequilibriu territorial. Busca correxir la concentración demográfica nel área central y revitalizar les ales (oriente y occidente). Midíes destacaes: Polítiques específiques pa territorios con riesgu de despoblación, empobinaes a ameyorar accesibilidá, conectividá y servicios públicos esenciales

7. Adaptación al cambéu. Empobina la rexón a una adaptación estructural énte los desafíos demográficos y socioeconómicos, con estratexes pa fortalecer la resiliencia demográfica y adaptar los servicios públicos a la realidá futura del territoriu.

Dir al documentu del Plan Demográficu del Principáu d’Asturies 2017-2027