Índiz de riesgu de quemes y prevención
Usu del fueu
La llei de Montes y Ordenación Forestal d’Asturies y la so normativa de desenvolvimientu PROHÍBE L’USU DEL FUEU nos montes y nuna franxa de 100 metros apegada a éstos, sacante una serie d’actividaes perconcretes permitíes con suxeción a unes condiciones d’execución o otres actividaes que precisen autorización emitida pola conseyería competente en materia forestal.
Estes actividaes escepcionales que dexen usar el fueu con condiciones son:
- Barbacoes, siempre que se nun exista prohibición espresa, s’executen n’instalaciones existentes con esa mira, l’IRIF d’esi día y llugar seya de 3 o inferior y el fueu quede apagáu dafechu una hora primero d’atapecer.
- Usu d’afumadores n’apicultura, siempre que l’IRIF d’esi día y llugar seya de 3 o inferior.
Les actividaes d’usu del fueu que pueden realizase namás con autorización espresa son:
- Fogueres, fueos de campamentu y festexos tradicionales. Escepcionalmente pueden ser autorizables fogueres destinaes a cocinar en festexos tradicionales.
- Quemes:
- Averaes a monte, a menos de 100 metros de terrenu forestal:
- Quemes en borrones o marallos en finques agrícolas.
- Quemes a manta en finques agrícoles.
- En monte:
- Quemes en borrones o marallos.
- Quemes de caltenimientu en brañes o camperes.
- Quemes controlaes o prescrites.
- Averaes a monte, a menos de 100 metros de terrenu forestal:
Pa considerar si un terrenu tien la consideración de “monte” (o terrenu forestal) tien que s’atender a la so definición n’art. 5 de la Llei 3/2004, de 23 de payares, de Montes y Ordenación Forestal.
Toes estes modalidaes de quema son puramente pa la quema de la vexetación ensin rozar o lo rozao xenerao nel mesmu sitiu y atópense suxetes al cumplimientu d’una serie de normes xenerales precautories y de bones práctiques, amás d’a otres específiques según modalidá de quema y a otres particulares que figuren na mesma autorización, toes elles de cumplimientu obligáu.
Les quemes “borrones o marallos en finques agrícoles” y les quemes “a manta en finques agrícoles”, les primeres namás de restos vexetales (fradadures, roces, siegues, etc.) y les segundes quemes pequeñes de carba, en terrenos allugaos a menos de 100 metros de monte, pueden solicitase presencialmente nes oficines comarcales o telemáticamente. Pa la tramitación telemática buscar “AUTO0005T01” en SEDE ASTURIAS.
Dambes modalidaes de quema en terrenos apartaos más de 100 metros de monte nun tán suxetes a la normativa en materia de prevención de quemes forestales.
Pa les demás modalidaes de quema en monte, ha cursase siempre solicitú d’autorización. Pal trámite telemáticu en SEDE ASTURIAS, buscar “AUTO0005T03” para quemes controlaes y “AUTO0005T02” pa quemes de brañes o camperes.
Depués d’autorización de les modalidaes de “quema de caltenimientu de brañes o camperes” o de “quemes controlaes o prescrites”, precísase d’un Plan de Quema qu’estudie y analice la viabilidá de la quema, sobre manera’l riesgu, y determine la so viabilidá técnica, planificando la so execución nel casu de qu’ésta resulte factible. Pa la ellaboración d’estos Planes de quema ellaboráronse unes instrucciones técniques que pueden descargase nesti enllaz:
Instrucciones técnicas sobre quemas controladas (pdf: 15 Mb)
Resulta reseñable sobre manera la modalidá de quema de brañes o camperes en monte. Esta modalidá ta pensada pal caltenimientu de camperes pa ganadería estensiva en camperes que tienden a volvese monte y que pueden executase, ente otros, polos mesmos ganaderos, nuna o delles xornaes, a lo llargo de 2 años desque s’autorice. Ye una modalidá de quema que resulta autorizable cuando los riesgos del usu del fueu seyan mínimos, al tratase d’árees de camperes o brañes de lladeres moderaes, onde la carba oxetu de quema tea en matos o teseles de tamañu pequeñu y nuna rodiada de verde que garantiza que’l fueu nun s’esparda.
Toes estes indicaciones del usu del fueu y de modalidaes de quema autorizables tienen calter puramente informativu. La so regulación pormenorizada ye la establecida na Resolución de 3 de setiembre del 2024, de la Conseyería de Mediu Rural y Política Agraria, pola que se regula l’usu del fueu, s’establecen les condiciones qu’hai que cumplir pa l’autorización de les quemes en terrenos forestales y la so franxa de colindancia, y se determinen normes pa les repoblaciones y los llabores selvícoles pa la prevención de quemes nos montes averaos a zones urbanes y núcleos rurales (BOPA 185, de 23-IX-2024).
Índiz diariu de Riesgu de Quema Forestal (IRIF)
Como’l so propiu nome indica, l’IRIF ye un indicador, que s’ellabora y publica diariamente, que reflexa’l riesgu de quema forestal d’un territoriu. N’Asturies ellabórase a nivel de conceyu. Esprésase nuna escala de 1 a 5, siendo:
- IRIF 1: riesgu de quema BAXA.
- IRIF 2: riesgu de quema MODERADA.
- IRIF 3: riesgu de quema ALTA.
- IRIF 4: riesgu de quema MUI ALTA.
- IRIF 5: riesgu de quema ESTREMA.
N’Asturies l’IRIF publícase diariamente, pudiendo consultase:
Tolos díes llaborables de 8:30 a 19:00 hores nel teléfonu 012 del Serviciu d’Atención Ciudadana.
Nes Oficines Comarcales de la Conseyería.
Al traviés de los medios de comunicación, televisión, radio y prensa escrita tanto rexonal como local.
- Nestes direcciones Web:
Consulta l'indiz diariu y por conceyos de riesgu de quema forestal
Resulta perimportante la so conocencia porque l’IRIF non solo cuantifica’l riesgu con calter informativu y organizativu sinón que, principalmente, ye una variable que determina la posibilidá de llevar a cabu delles actividaes regulaes d’usu del fueu o de riesgu de provocar quema, de circulación per monte o d’execución de les actividaes autorizaes condicionaes por esti índiz.
Principales limitaciones condicionaes al IRIF diariu
Amás de la prohibición xenérica, seya’l que seya l’IRIF, de “tirar o dexar oxetos en combustión o cualquier clas de material susceptible d’empezar una quema” en monte o en terrenos que s’atopen a menos de 100 metros de monte, cuando l’IRIF seya de 4 (mui altu) ó 5 (estremu) principalmente establécense estes limitaciones del usu del fueu:
- En monte o en terrenos a menos de 100 metros de monte:
- Nun se dexa nenguna de les modalidaes de quema, anque dispongan d’autorización.
- Nun se dexa prender fueu nes zones recreatives y d’acampada, nin siquiera nes zones habilitaes pa eso (barbacoes, etc.).
- Nun se dexa la introducción y usu de material pirotécnico.
- Nun se dexa l’usu d’afumadores nos llabores apícoles.
- En monte o n’árees rurales que s’atopen a menos de 400 metros de monte:
- Nun se dexa l’usu de maquinaria y equipos que’l so funcionamientu xenere deflagración, chispes o descargues eléctriques, con estes escepciones:
- Si s’autorizaron espresamente, coles condiciones que procedan.
- Actividaes autorizaes rellacionaes col caltenimientu o la construcción d’infraestructures y servicios públicos, como carreteres, ferrocarriles, enerxía eléctrico, gas natural, telecomunicaciones, etc.
Nes pistes forestales o caminos que vaigan, intersecten o tean apegaos a montes incluyíos nel dominiu públicu establecíu pol artículu 7 de la Llei de Montes y Ordenación Forestal del Principáu d’Asturies:
- Nun se dexa entrar a persones y vehículos ayenos a esos montes; sacante los servicios de l’Alministración rexonal o local y los servicios de vixilancia de los Cuerpos y Fuercies de Seguranza del Estáu.
Zones de Riesgu Altu de Quema Forestal (ZAR)
En cumplimientu del artículu 62 de la Llei del Principáu d’Asturies 3/2004 de Montes y Ordenación Forestal, y en base a estudios realizaos pola Universidá d’Uviéu d’análisis del riesgu estructural de quema forestal de la rexón, definiéronse los conceyos d’Asturies de riesgu altu de quema forestal, que se publicaron gracies a la Resolución de 12 d’abril del 2007, de la Conseyería de Mediu Rural y Pesca, pola que se declaren Zones de Riesgu Altu de quema forestal (ZAR).
Estratexa integral de prevención y llucha contra quemes forestales
L’análisis estratéxicu integral en materia de quemes forestales n’Asturies empezó col “Plan d’Actuación Integral en Quemes Forestales d’Asturies 2006-2007”, onde se contemplaben unes llinies estratéxiques d’actuación y se recoyía un paquete de programes y midíes nesta materia p’aquel periodu. Esti plan foi l’aniciu de les estratexes posteriores ellaboraes cola mira d’avanzar nuna xestión integral del problema de les quemes forestales n’Asturies.
L’actual Estratexa Integral de Prevención y Llucha contra Quemes Forestales (EPLIFA) establez el diagnósticu de la situación pa los asuntos clave, colos conseyos pa tener en cuenta pa les actuaciones futures, sobre l’asuntu de quemes forestales, y la estratexa d’acción, que se concreta na propuesta pal desenvolvimientu de los programes, llinies, midíes y acciones pal periodu ente’l 2020 y el 2025.
Plan Anual de Prevención, Vixilancia y Estinción del Principáu d'Asturies
La ellaboración del Plan Anual de Prevención, Vixilancia y Estinción del Principáu d’Asturies pa la campaña 2025 obedez a lo dispuesto n’artículu 48 de la Llei 43/2003, de 21 de payares, de Montes, que dispón que les comunidaes autónomes, énte’l riesgu xeneral de quemes forestales, han ellaborar y aprobar planes anuales pa la prevención, vixilancia y estinción de quemes forestales. Los planes mentaos han recoyer toles actuaciones qu’hai que desenvolver y han garrar tol territoriu de la comunidá autónoma correspondiente.
L’oxetivu principal d’esti plan ye ser un preséu de xestión anual en materia de quemes forestales dende una perspectiva integral de prevención, vixilancia y estinción. L’ámbitu territorial va ser el de la totalidá del territoriu del Principáu d’Asturies y l’ámbitu temporal abarca la campaña 2024-2025; concretamente, el so desenvolvimientu garra dende’l 1 de payares del 2024 hasta’l 31 de ochobre del 2025.