Deportes tradicionales
Bolo batiente
Equipamientu
El númberu de bolos usáu va ente los 11 y los 14. Son siempre de madera de castañu, ablanu, bidul, mazanu o faya, con mayor grosor pela base. Fabríquense con zuela o raseru. El so altor va ente 40 y 43 cm, tienen un diámetru na so base de 3-4 cm y na so cabeza d’unos 2 cm, y un pesu d’unos 400 grs. Los bolos que meyor vuelen son los de madera d’ablanu.
Pa colocar los bolos na llosera emplégase barru de texera o nel so defeutu cualquier variedá de tierra barrial, y barru mariello de charca.
Les boles son de madera d’ancina preferentemente, de 12 a 13 cm. de diámetru, esfériques y de superfecie llisa. El so pesu ye de 3 a 5 quilos aproximadamente.
Descripción
Xuegu tradicionalmente asturianu prauticáu nuna amplia zona de la parte centro-occidental d’Asturies. Pa la so práutica necesítense cualidaes físiques esceicionales y notables en quien lu xuega. El pesu de la bola y la dificultá del xuegu obliguen a facer esfuercios grandes, a afinar la puntería en gran midida y a ser diestru nel llanzamientu de la bola pa consiguir grandes xugaes.
El xuegu consiste esencialmente en llanzar boles rodando dende’l terrén de tiru, allugáu a una distancia aproximada d’unos 20 metros, en direición a una llosa na que se coloquen los bolos, y valtar y llanzar éstos a la mayor distancia posible. La potencia, el pulsu y l’estolaxe pa dar efeutu a la bola son carauterísticos d’un bon xugador de Batiente.
Observaciones
La modalidá de la Batiente prautícase nos llugares de Salas, Candamu, Pravia, Grau, Cuideiru, Illas, Cadavéu y Samartín de Lluiña.
Bolo celta
Equipamientu
Cada equipu cuenta con 4 xugadores. Emprimen a tirar dende’l “tiru” (2 xugadores de cada equipu, intercalaos). Dempués, estos xugadores van “sacar” dende la raya de diez pol mesmu orde de tiru. Tres d’eso, tiren los cuatro xugadores que falten, intercalaos.
Descripción
Tien el so orixe nos paises nórdicos. Esta modalidá llegó al traviés del pueblu celta, gran aficionáu a esti tipu de xuegos. Onde se conserva con tola so pureza ancestral ye na zona occidental del Principáu, concretamente nel conceyu de Tinéu.
Antaño, les boleres taben allugaes nes places del pueblu, delantre de les ilesies; yera’l sitiu más afayaízu, onde tamién celebraben les romeríes. Güei tan feches en terrenos empobinaos pa esi usu y bastante alloñaes de los núcleos urbanos pa que nun peligre naide, amás de la necesidá d’espaciu.
Concursos
Antaño, les competiciones facíense al rodiu del apueste d’una xarra de vinu o botelles de sidra; ye persabíu que los mirones tomaben más d’ello que los propios xugadores, entrenteníos completamente col xuegu.
Anguaño’l xuegu tien estes fases: Tirar, llanzar la bola dende la poya a la bolera pa consiguir el máximu tantéu. Sacar, llanzar la bola dende la raya de diez a la bolera pa consiguir el máximu tantéu.
Observaciones
La forma de “sacar” del xugador queda a llibre eleición d’ésti, ensin pisar la raya, y el xugador nun trespasará ésta hasta que la bola nun pase la horizontal de los bolos, pela cueta, la sacada ye nula.
Bolo palma
Equipamientu
El xugador de bolos tien que coyer les boles del suelu, colocales na palma de la mano, fixar el pie que correspuende a la mano qu’usa pa xugar nos “tiros” y sitios del “birlle” y aprovechando l’impulsu que da con cuerpu y piernes, facer col brazu un movimientu paralelu al cuerpu p’atrás y p’alantre, capaz a impulsar la bola pa qu’ésta faga xuegu.
El númberu de bolos ye de 9, colocaos formando un cuadráu de 3 bolos por llau, mas el “boliche” o bolu pequeñu.
Descripción
Xuegu de bolos, prauticáu en bolera. La fin ye valtar coles boles el mayor númberu de bolos y consiguir emboques acordies coles normes d’esti xuegu.
El xuegu consta de dos fases: “Tirar” y “Birllar. “Tirar” ye llanzar les boles dende’l “tiru” talamente que lleguen dende l’aire direutamente a la caxa o a un sitiu próximu a ella, col envís de facer xuegu, valtar bolos y sacar “emboque”. Y “Birllar”, que ye volver a llanzar les mesmes boles que tiraron, siempre que resulte válida la xugada, dende’l sitiu qu’ocupen a la caxa, pa facer xuegu y tirar bolos. Cuando la bola válida queda nel “campu de birlle” tan cerca o dientro de la caxa que’l xugador pue tocar cola mano los bolos, ésti pue optar por una modalidá de “birlle” llamada “segar”, que consiste en valtar bolos ensin soltar la bola de la mano.
Observaciones
El bolu palma xuégase principalmente nos valles Altu y Baxu de Peñamellera, Ribadeva y Llanes.
Bolos: La Cuatreada
Equipamientu
La Bolera ta formada pol castru, zona intermedia y tiru.
Los bolos, son 9, de madera y un altor de 52 cm. El biche, bolu más pequeñu (28 cm.), tamién de madera.
La bola, tradicionalmente ye de madera, anque empieza a ser usada la de fibra. Pesa ente 500 y 800 grs.
Descripción
El xuegu de los bolos trata de valtar unos palos llantaos en suelu, con una bola tamién de madera, dende una distancia determinada. Paez que solo la Cuatriada ye autóctona d’Asturies.
Ye un deporte qu’esixe habilidá manual y dixital, concentración, puntería y coordinación visomotora, pulsu fierme y resistencia al temblor.
La so área d’influyencia estiéndese dende l’oriente al centru de la rexón, con especial protagonismu nos núcleos industriales.
Concursos
Tribes de partides:
- Mano a mano: 6 boles/xugador
- Pareya: 3 boles/xugador
- Tríos: 3 boles/xugador
- Cuartetos: 2 boles/xugador
- Quintetos: 2 boles/xugador
La puntuación ye acumulativa. Súmase: por meter la bola dientro, por tirar bolos, por cuatriar, y por parar la bola dientro del castru.
Carrera de lecheres
Descripción
Esti deporte imita les carreres que facíen antiguamente los ganaderos coles llecheres de 35 llitros.
Anguaño, nes competiciones, les llecheres sustitúinse por unos cilindros de fierro macizo con ases d’aproximadamente esi pesu.
Trátase d'andar con elles la mayor distancia posible nun tiempu determináu ensin apoyales nel suelu.
Esta prueba resulta mui dura yá que munches veces ye mayor el pesu de les “llecheres” que’l de los participantes.
Corta de troncos con Hacha
Equipamientu
Los hachos usaos son de varies frasques.
- Hachu de mina. Úsenla los mineros. Tien una forma peculiar.
- Hachu vascu. Más calidable que l'anterior, yá que ta fechu con un aceru especial.
- Hachu australianu. Asemeyáu al vascu na so forma, sicasí fechu con delles aleaciones de distintos metales pa da-y mayor robustez.
Descripción
Esta modalidá, prauticada yá polos antiguos mineros, consiste en cortar un númberu determináu de tueros en dos partes nel menor tiempu posible.
Hai dos formes de cortar:
- La Tradicional, na que’l cortador, dende’l suelu, corta’l tueru que ta amarráu con una “cruceta de fierro” per ún de los sos llaos.
- La Vasca, onde’l cortador, corta’l tueru asitiándose penriba d’él. Fíxase con unos tacos de madera cincaos na base del tueru, y pa que’l cortador nun pierda l’equilibriu, fai un chaflán na parte d’arriba.
Concursos
Nos campeonatos de Corta de Tueros realízase un sortéu enantes, pa dar un tueru, o dellos, a cada cortador, yá que los tueros nunca son iguales del too.
Corta de troncos con Hacha y Tronzón
Descripción
Esti deporte solo se fai n’Asturies y consiste en cortar un tueru de 2 m. en cuatro “tocones” o cachos d’unos 30 cm. con un tronzón o sierra. Al acabar los cuatro cortes, un cortador de la pareya ha cortar con un hachu los trozos a la metá, y l’otru ha abrir esos “tocones” en 8 estielles caún, pa dempués apilar les 32 estielles nuna torre que tien que mantenese en pies. La prueba termina cuando los tueros tán partíos col hachu y la torre ta acabada. Si l’equipu tronza más de 32 estielles, queda descalificáu.
Concursos
Nos campeonatos de Corta de Tueros faise un sortéu enantes pa dar un tueru, o dellos, a cada cortador, yá que los tueros nunca son iguales dafechu.
Equipamientu
L’equipu ta formáu por dos cortadores.
Los hachos son:
- Tradicional, usáu polos mineros. Vascu, fechu n’aceru especial, mui resistente. Australianu, asemeyáu a l’anterior, por embargu fechu con una aleación de varios metales.
- Los tronzones son: Asturianos, sierra de dos ases, de dientes simples. Vascos y australianos, sierra de dos ases de dientes dobles.
Corta de troncos con Tronzón
Equipamientu
Los tronzones son de varies frasques:
- Tronzón Asturianu: Sierra de dos ases, de diente simple.
- Tronzón Vascu o Australianu: Sierra de dos ases, de diente doble.
Descripción
Nesta modalidá hai que facer un númberu de raxes a un tueru con una sierra de dos ases nel menor tiempu posible.
El tueru afítase nun soporte pa que nun se mueva.
Concursos
Nos campeonatos de Corta de Tueros faise un sortéu enantes, pa dar un tueru, o dellos, a cada cortador, desque los tueros nunca son iguales dafechu.
La llave
Equipamientu
Pa xugar a la llave precísase un terrén de xuegu o cancha de llave (espaciu llanu de 15 m de llargor por 2 m d’anchor con tres zones bien definíes: la zona de tiru, la zona media y la zona de la llave), la llave, oxetu de fierro, ente 47 y 57 cm d’altor, formáu pol clavu de fierro y tres aletes de distintu tamañu (l’aleta superior ente 17 y 24 cm, la inferior ente 28 y 36 cm, y la media d’un tamañu ente dambes), y les fiches, de forma circular, feches en fierro, que pesen ente 500 y 600 g, d’un grosor ente 14 y 18 mm, y ente 70 y 75 mm de diámetru.
Descripción
La llave clasifícase dientro de los xuegos populares y deportes tradicionales que se xueguen n’España, y concretamente n’Asturies, dientro del grupu de xuegos y deportes de llanzamientu nes modalidaes de precisión, como los bolos, la toka, la calva, etc.
El deporte de la llave básase en llanzar seis fiches de fierro acerao consecutivamente dende la zona de tiru, apuntando pa golpiar la llave que ta a una distancia de 14 m, fincada en suelu, ente les paredes del caxón.
Les partíes suelen disputase a 10 tiraes por xugador. Pueden xugase d’un solu xugador contra otru, lo que se denomina “mano a mano”, por pareyes, tercetos, cuartetos o quintetos.
Tiru al palu
Descripción
Dos participantes siéntense ún frente a otru colos pies afitaos nuna tabla. Garrándose dempués a un palu, tenten d’alzar al so oponente o face-y soltar el palu.
Ye la meyor de trés “tiraes” y escueye campu, ye dicir, primero ún cueye’l palu coles manes apegaes pela parte interior del palu y, na siguiente tirada, tóca-y pela parte esterior.
En casu d’empate, ha tirase una moneda y escoyese la forma d’agarre.
Tiru de cuerda en pista
Equipamientu
Precísase una cuerda y una pista. Ésta pue ser n’asfaltu (pista d’asfaltu o formigón) o en goma (pista especial de goma de 30 metros de llargor por 1 metru d’anchor).
Descripción
Dos equipos de 8 xugadores caún gárrense a una cuerda, onde amarren tres cintes. La del mediu indica la metá de la cuerda, y al emprimar, tien que coincidir con una marca nel suelu. L’equipu ganador ye’l que fai pasar la cinta más cercana al otru equipu pela marca del suelu.
Cada equipu ta compuestu por 8 deportistes que tenten d’arrastrar al otru equipu.
El ganador ye’l meyor de tres tiraes. En casu d’empate ha escoyese campu, pues primero tírase d’un llau y dempués del otru.
Tiru de cuerda en tierra
Equipamientu
La pista de tierra permite dos modalidaes de tiru:
- De pies: Equipos de 6 u 8 persones tenten d’arrastrar al otru equipu ensin sentase en suelu.
- Con poces: Los equipos, de 6 persones, sentaos en suelu y metiendo los pies nunos pozos, fechos previamente, han tirar del otru equipu.
Descripción
Dos equipos de 6 u 8 xugadores caún gárrense a una cuerda onde se colocaron tres cintes. La del mediu indica la metá de la cuerda, y al empezar, tien que coincidir con una marca en suelu. L’equipu ganador ha ser el que faga pasar la cinta más cercana al otru equipu pela marca, ensin sentase en suelu.
El ganador ye’l meyor de tres tiraes. En casu d’empate escuéyese campu, yá que primero tírase d’un llau y dempués del otru.