Usu del fueu

La llei de montes y Ordenación Forestal d’Asturies y la so normativa de desenvolvimientu PROHIBE L’USU DEL FUEU nos montes y nuna franxa de 100 metros colindante a estos, sacante una serie d’actividaes mui concretes que se permiten con suxeción a unes condiciones d’execución o otres actividaes que precisen autorización espidida pola Conseyería competente en materia forestal. Estes actividaes escepcionales que dexen l’usu del fueu con condiciones son:

  • Barbacoes, siempre que se nun exista prohibición espresa, execútense n’instalaciones existentes pa tal fin, l’IRIF d’esi día y sitiu seya de 3 o inferior y el fueu quede apagáu dafechu una hora primero de l’ocasu.
  • Usu d’afumadores n’apicultura, siempre que l’IRIF d’esi día y sitiu seya de 3 o inferior.

Les actividaes d’usu del fueu que se pueden realizar namás con autorización espresa son:

  • Fogates, fueos de campamentu y festexos tradicionales. Escepcionalmente pueden ser autorizables fogates destinaes a cocinar en festexos tradicionales.
  • Quemes:
    • Próximes a monte, a menos de 100 metros de terrenu forestal.
      • Quemes en montones o gordones en finques agrícoles.
      • Quemes a manta en finques agrícoles.
    • En monte:
      • Quemes en montones o gordones.
      • Quemes de caltenimientu en brañes o camperes.
      • Quemes controlaes o prescrites.

A efectos de considerar si un terrenu tien la consideración de “monte” (o terrenu forestal) ha atendese a la so definición n’artículu 5 de la Llei 3/2004, de 23 de payares, de Montes y Ordenación Forestal.

Toes estes modalidaes de quema son puramente pa la quema de la propia vexetación en pie o los sos restos xeneraos nel mesmu llugar y tán suxetes al cumplimientu d’una serie de normes xenerales precautories y de bones práctiques, amás d’a otres específiques según modalidá de quema y a otres particulares que figuren na propia autorización, toes elles de cumplimientu obligáu.

Importante

Previa autorización de les modalidaes de “quema de caltenimientu de brañes o camperes” o de “quemes controlaes o prescrites”, ríquese d’un Plan de Quema qu’estudie y analice la viabilidá de la quema, sobre manera’l riesgu, y determine la so viabilidá técnica, planificando la so execución en casu de qu’esta resulte factible. Pa la ellaboración d’estos Planes de quema ellaboráronse unes instrucciones técniques que se pueden descargar nesti enllaz:

Resulta especialmente reseñable la modalidá de quema de brañes o camperes en monte. Esta modalidá ta pensada pal caltenimientu de pastos pa ganadería estensiva en camperes que tienden a matorralizase y que pueden ser executaes, ente otros, polos propios ganaderos, nuna o delles xornaes, a lo llargo de 2 años tres de la so autorización. Ye una modalidá de quema que resulta autorizable cuando los riesgos del usu del fueu seyan mínimos, al tratase d’árees de camperes o brañes de pendientes moderaes, nes que la carba oxetu de quema ta distribuyida en manches o teseles de tamañu pequeñu y nuna redolada de pastu verde que garantiza que’l fueu nun s’estienda.

Toes estes indicaciones del usu del fueu y de modalidaes de quema autorizables tienen calter puramente informativu. La so regulación pormenorizada ye la establecida na Resolución de 3 de setiembre del 2024, de la Conseyería de Mediu Rural y Política Agraria, pola que se regula l’usu del fueu, establécense les condiciones a cumplir pa l’autorización de les quemes en terrenos forestales y la so franxa de colindancia, y determínense normes pa les repoblaciones y los llabores selvícoles pa la prevención de quemes nos montes cercanos a zones urbanes y núcleos rurales (BOPA 185, de 23-IX-2024).

Índiz diariu de riesgu de quema forestal (IRIF)

L’IRIF ye un indicador que s’ellabora y publica diariamente y que reflexa’l riesgu de quema forestal d’un territoriu. N’Asturies ellabórase a nivel de conceyu. Esprésase nuna escala de 1 a 5, siendo:

  • IRIF 1: riesgu de quema BAXA
  • IRIF 2: riesgu de quema MODERADA
  • IRIF 3: riesgu de quema ALTA
  • IRIF 4: riesgu de quema MUI ALTA
  • IRIF 5: riesgu de quema ESTREMA

N’Asturies l’IRIF publícase diariamente, pudiendo consultase:

  • Tolos díes llaborables de 8:30 a 19:00 hores nel teléfonu 012 del Serviciu d’Atención Ciudadana.
  • Nes Oficines Comarcales de la Conseyería.
  • Al traviés de los medios de comunicación, televisión, radio y prensa escrita tanto rexonal como local.
  • Nestes direcciones web:

Resulta mui importante’l so conocimientu, yá que l’IRIF non solo cuantifica’l riesgu con calter informativu y organizativu sinón que, principalmente, ye una variable que determina la posibilidá de llevar a cabu ciertes actividaes regulaes d’usu del fueu o de riesgu de provocar quema, de circulación por monte o d’execución de les actividaes autorizaes condicionaes por esti índiz.

Principales llimitaciones condicionaes al IRIF diariu

Amás de la prohibición xenérica, cualquier que seya l’IRIF, de “tirar o abandonar oxetos en combustión o cualquier clase de material susceptible d’aniciar una quema” en monte o en terrenos allugaos a menos de 100 metros de monte, cuando l’IRIF seya de 4 (mui altu) o 5 (estremu) principalmente establécense estes llimitaciones del usu del fueu:

  • En monte o en terrenos allugaos a menos de 100 metros de monte:
    • Nun se dexa nenguna de les modalidaes de quema, anque dispongan d’autorización.
    • Nun se dexa prender fueu nes zones recreatives y d’acampada, nin siquier nes zones habilitaes pa eso (barbacoes, etc.).
    • Nun se dexa la introducción y usu de material pirotécnico.
    • Nun se dexa l’usu d’afumadores nos llabores apícoles.
  • En monte o n’árees rurales allugaes a menos de 400 metros de monte:
    • Nun se dexa la utilización de maquinaria y equipos que’l so funcionamientu xenere españida, chispes o descargues eléctriques, con estes escepciones:
      • Si foi autorizáu espresamente, coles condiciones que procedan.
      • Actividaes autorizaes rellacionaes col caltenimientu o la construcción d’infraestructures y servicios públicos, como carreteres, ferrocarriles, enerxía eléctrica, gas natural, telecomunicaciones, etc.
      • Nes pistes forestales o caminos que pasen, intersecten o colinden con montes incluyíos nel dominiu públicu establecíu pol artículu 7 de la Llei de Montes y Ordenación Forestal del Principáu d’Asturies:
    • Nun se dexa l’accesu de persones y vehículos ayenos a esos montes, sacante los servicios de l’alministración rexonal o local y los servicios de vixilancia de los Cuerpos y Fuercies de Seguridá del Estáu.
[Ancla]

Zones de Riesgu Altu de Quema Forestal (ZAR)

En cumplimientu del artículu 62 de la Llei del Principáu d’Asturies 3/2004, de Montes y Ordenación Forestal, y en base a estudios realizaos pola Universidá d’Uviéu d’análisis del riesgu estructural de quema forestal de la rexón, definiéronse los conceyos d’Asturies de riesgu altu de quema forestal, que foron publicaos gracies a la Resolución de 12 d’abril del 2007, de la Conseyería de Mediu Rural y Pesca, pola que se declaren Zones de Riesgu Altu de quema forestal (ZAR).

[Ancla]

Normativa aplicable

La normativa estatal y autonómica aplicable nel usu del fueu ye esta:

  • Llei 43/2003, de Montes. Regula’l caltenimientu y usu sostenible de recursos forestales en tol país.
  • Real Decretu-llei 15/2022, de 1 d’agostu, pol que s’adopten midíes urxentes en materia de quemes forestales.
  • Llei 3/2004, de 23 de payares, de Montes y Ordenación Forestal del Principáu d’Asturies.
  • Llei 4/2024 del Principáu d’Asturies establez cambeos en materia de quemes forestales de la Llei 3/2004, de 23 de payares, de Montes y Ordenación Forestal, nel marcu de los cambeos de la llexislación básica estatal.
  • Decretu 51/2025, de 29 d’abril, pol que s’establez la estructura orgánica básica de la Conseyería de Movilidá, Mediu Ambiente y Xestión d’Emerxencies.
  • Decretu 3769/1972, de 23 d’avientu, pol que s’aprueba’l Reglamentu de la Llei 81/1968, de 5 d’avientu, sobre Quemes Forestales, establez una serie de midíes en materia de prevención de quemes
  • Alcuerdu de 20 d’avientu del 2017, del Conseyu de Gobiernu, pol que s’aprueba’l Plan Especial de Protección Civil d’Emerxencia por Quemes Forestales del Principáu d’Asturies (INFOPA).
  • Resolución de 3 de setiembre del 2024, de la Conseyería de Mediu Rural y Política Agraria, pola que se regula l’usu del fueu, s’establecen les condiciones a cumplir pa l’autorización de les quemes en terrenos forestales y la so franxa de colindancia, y determínense normes pa les repoblaciones y los llabores selvícoles pa la prevención de quemes nos montes cercanos a zones urbanes y núcleos rurales.

La Conseyeria de Mediu Rural ye la conseyería que llegalmente reconoz la Llei 3/2004, de Montes y Ordenación Forestal, como competente nel marcu de les orientaciones estratéxiques etablecíess en materia de prevención de quemes, la planificación, coordinación y execución de les midíes y acciones necesaries pa la prevención contra les quemes forestales en collaboración coles demás Alministraciones públiques y los particulares.

La dirección xeneral de Custodia del Territoriu y Prevención de Quemes ye competente na aplicación y desenvolvimientu de la normativa autonómica rellacionada cola planificación, prevención, vixilancia y estinción de quemes forestales.