Archivu Xeneral de l'Alministración
¿Quiénes somos?
L’Archivu Xeneral de l’Alministración del Principáu d’Asturias tien como misión l’alministración de documentos alministrativos nos sos distintos soportes, la normalización de les polítiques y procedimientos de xestión de documentos, amás de la organización, custodia, disposición, accesu y caltenimientu a llargu plazu de los mesmos, permitiendo que la evidencia y la información que contienen puean recuperase en cualquier momentu.
Coordina y controla’l funcionamientu de los distintos archivos alministrativos, axunta los documentos tresferíos polos mesmos, desque acaba’l so trámite y cuando la so consulta ye esporádica, y onde permanecen hasta la so eliminación o tresferencia al Archivu Históricu. Amás, correspuénde-y l’alministración y esplotación de l’aplicación o aplicaciones utilizaes como repositoriu institucional de documentos destinaos a cubrir el conxuntu del ciclu de vida de los mesmos en cualquier soporte.
L’Archivu Xeneral conviértese en garante de la tresparencia y integridá de la xestión documental y en sofitu a la xestión alministrativa dientro de l’Alministración Autonómica.
Localización
Edificiu Alministrativu de Servicios Múltiples del Principáu d'Asturies (EASMU)
Cai Antonio Suárez Gutiérrez, 2
33005 – Uviéu
Horarios
De Lunes a Viernes: 09:00 - 14:00 h
Datos de contacto
- Teléfono: 985 105 366
- Correo electrónico: sigia@asturias.org
Llexislación
- Llei 7/1981, 30 de d'avientu, del Estatutu d'Autonomía p'Asturies y actualizaciones. Configuración competencial asturiana. L'Alministración del Principáu d'Asturies.
- Decretu 11/1995, de 27 de xunetu, sobre estructura orgánica de la Conseyería de Cooperación. Configura l'Archivu Xeneral de l'Alministración del Principáu d'Asturies como órganu que, integráu na Vicesecretaría Xeneral de la Secretaría Xeneral Técnica, tien al so cargu la custodia y caltenimientu d'espedientes y documentación alministrativa d'esta Alministración.
- Decretu 21/96, de 6 de xunu, pol que se regula la organización y funcionamientu del sistema d'archivos alministrativos del Principáu d'Asturies.
- Resolvimientu del 3 de marzu de 1999, de la Conseyería de Cooperación, que desenvuelve'l decretu 21/96 de 6 de xunu, pol que se regula la organización y funcionamientu del Sistema d'Archivos Alministrativos del Principáu d'Asturies.
- Resolvimientu de 22 de marzu de 2016, de la Conseyería de Presidencia y Participación Ciudadana, pola que s'aprueba la Política de Xestión de Documentos del Principáu d'Asturies.
- Resolvimientu de 25 d'abril de 2019, pola que s'aprueba'l dictame de la sesión estraordinaria de la CCVDAPA sobro l'afitamientu del Cuadru Xeneral de Clasificación de Documentos Alministrativos del Principáu d'Asturies y modificáu parcialmente dende entós por 42 resolvimientos de la conseyería competente
Estructura orgánica
- Decretu 73/2023, de 18 d'agostu, pol que s'establez la estructura orgánica básica de la Conseyería de Presidencia, Retu Demográficu, Igualdá y Turismu.
- Decretu 24/2024, de 15 de marzu, de primer cambéu del Decretu 73/2023, de 18 d'agostu, pol que s'establez la estructura orgánica básica de la conseyería de Presidencia, Retu Demográficu, Igualdá y Turismu
L'edificiu
L'Archivu Xeneral de l'Alministración del Principáu ta asitiáu nel Edificiu Alministrativu de Servicios Múltiples del Principáu d'Asturies (EASMU), na conocida como zona de Llamaquique, n'Uviéu.
Nació por una mezclienda desigual d'azar y necesidá: a mediaos de los ochenta, Uviéu cuntaba con un solar ensin uso de gran envergadura, al empar que'l Gobiernu autonómicu, daquella creáu va poco al amparu del Estatutu de 1981, andaba en busca d'una sede pa centralizar los sos departamentos espardíos per tola ciudá. L'EASMU y les construcciones que, na su controna, ocupen toa una mazana en Llamaquique foron la respuesta a esa situación.
El Principáu axuntó a un xuráu de prestixu y convocó un concursu nacional anunciáu ente tolos arquitectos españoles, pero resultó que la propuesta favorita de los xueces llegó dende percerca: los hermanos Hernández Sande, asturianos y malapenes con 30 años cumplíos, foron los escoyíos. Los sos autores, conscientes de que l'encargu venía del Gobiernu asturianu y del papel institucional qu'había de desempeñar, escoyeron trés materiales de construcción enllenos de simbolismu: aceru pola industria rexonal, vidriu verde como la naturaleza y el mar y piedra como les peñes y los montes d'Asturies.
L'edificiu tien una estructura metálica y una fachada ventilada que permite la circulación del aire per detrás de la piedra y enfresca l'edificiu, racional y modernu, con detalles estéticos de tipu funcional. Destaca la visera de la fachada sur, que sirve de protección d'esa zona del sol.
L'EASMU costó uno 19,27 millones d'euros (3.200 millones de pesetes de la dómina), inaugurándose en 1993. L'Archivu Xeneral, dientro del EASMU, alluga les sos oficines na 5º planta- sector esquierdu y los sos 4 depósitos documentales n'el sótanu -3, con una estensión de 11.850 metros lliniales pa la custodia de la documentación.
Servicios a la ciudadanía
El serviciu de consultes del Archivu Xeneral tien como oxetivu permitir a la ciudadanía acceder y consultar los documentos alministrativos que s’atopen en custodia nel archivu. Esta consulta pue ser presencial, por visita a la sala de consulta, o en llinia, siempre y cuando’l volume de la documentación y el nivel d’accesu de la mesma lo permitan. P’acceder al serviciu de consulta, los usuarios han de cumplimentar y unviar al traviés de les Oficines del Serviciu d’Atención al Ciudadanu, Oficines d’Asistencia en materia de Rexistru de les Conseyeríes del Principáu d’Asturies y por cualquiera de los medios previstos n’artículu 16.4 de la Llei 39/2015, de 1 d’ochobre, del Procedimientu Alministrativu Común de les Alministraciones Públiques, la solicitú correspondiente y cumplir les normes establecíes.
Ye importante destacar que l’Archivu Xeneral tien la responsabilidá de garantizar la protección de los documentos y la privacidá de la información contenida nellos, polo qu’existen delles llimitaciones no tocante al tipu de consulta que s’ufierta y la información que pue facilitase.
Obtención de copies
L’exerciciu del derechu d’accesu contempla de forma complementaria llograr copies o certificaciones de los documentos consultaos, lo que ta suxeto a les tases alministratives correspondientes.
Dende'l Serviciu d'Autoliquidación de tases y otros Ingresos va poder seleccionar Tramitación electrónica o confección "on line" o la descarga del modelu 046 para la so tramitación presencial. Tamién se dispón d'información sobre les tarifes vixentes.
Procesos y fondos documentales
Los fondos documentales del Archivu Xeneral de l’Alministración son el conxuntu de documentos, seya cual seya’l so soporte, producíos pola Administración del Principáu d’Asturies y que s’axuntaron de manera orgánica por causa del so usu o actividá.
Tresparencia
Los archivos alministrativos contribuyen al cumplimentu de la tresparencia, l’accesu a la información pública y les normes de bon gobiernu, exes fundamentales que rixen les alministraciones públiques. L’Archivu Xeneral de l’Alministración del Principaú d’Asturies proporciona información actualizada sobre la so actividá, al tiempu que facilita l’accesu, según la normativa vixente, a la documentación custodiada al traviés del so serviciu de consulta.
Actividaes y eventos
L’Archivu Xeneral de l’Alministración del Principáu d’Asturies entama visites a les sos instalaciones. Nel trescursu d’ella, los participantes tienen la oportunidá de conocer de primer mano les instalaciones del Archivu Xeneral, amás del procesu de valoración documental que se fai pa garantizar la preservación y xestión afayadiza de la información.
Esta actividá desenvuélvese trimestralmente.
Si quier recibir información de la programación de les visitas, unvie un corréu electrónicu a sigia@asturias.org o al traviés del teléfonu 985 10 53 66