Práutiques deportives tradicionales

El batéu d’oru nun necesita cualidaes especiales nin grandes inversiones n’equipamientu, solo l’amor pola vida llibre y la naturaleza.

L’elementu básicu pa esta práutica deportiva ta na batea. La batea ye n’esencia una especie de sartén. Son de distintos materiales; atopáronse batees antigües de madera, hailes metáliques, y, anguaño, tan faciéndose en fibra. Tienen delles formes; la más común ye la cónica, conocida popularmente como sombreru chinu. Hailes ovalaes, de fondu planu, estriaes, allargaes...

La manera d’usar la batea consiste en llenala de sable nel sitiu escoyíu, somorguiala nel agua (nel ríu llibre, buscando una corriente llixera) y, faciendo un suave movimientu, provocar la rotación del agua pel borde de la batea pa separtar el sable superficial. Ye importante revolver la tierra cola mano pa que los materiales con mayor pesu específicu se posen nel fondu de la batea, y con ella dientro del agua, dir quitando les piedres de mayor tamañu, esclarándoles primero pa que nun marchen pebides apegaes a elles. Esto tien de facese periódicamente pa que nun quede munchu sable, y pueda alisase cola mano na superficie de la batea pa descubrir les pebides.

Pa sacar les pebides han separtase cuanto más meyor del sable, d’una nuna, y poner un deu secu sobre éstes, de manera que queden apegaes a él. Recuéyense en probetes pequeñes, cásique enllenes d’agua, tápense col mesmu deu que tien la pebida, vuélcase’l frascu ensin dexar salir l’agua que fai que se desprienda del deu. Dempués abasta con tapar la probeta, y l’agua nel so interior val como lupa pa mirar la pebida.

Los campeonatos de batéu d’oru son la meyor forma d’introducise nesti deporte y deprender les téuniques de batéu. Estos eventos deportivos cuenten con una gran asistencia d’aficionaos qu’intercambien el so saber y noticies. En cada país suel celebrase un campeonatu nacional al que, contradiciendo’l so nome, suelen dir tamién bateadores d’otros países. Tanto estos campeonatos como’l Campeonatu Mundial de Batéu d’Oru ríxense poles normes de la Federación Mundial de Batéu.

Nos campeonatos internacionales cada bateador tien un cubu con una cantidá de sable pente los 10 y 20 kg. dependiendo de la categoría, nel que meten un númberu de pebides solo conocíes pol xuráu (ente 5 y 20) dependiendo de la ronda y categoría. Poles mesmes atienen una batea y un tubu de cristal o plásticu pa guardar les pebides.

Los competidores sitúense en caxones con agua, onde pueden llavar el sable pa buscar l’oru, nun tiempu que suel variar ente los diez y venti minutos.

Cada ronda dura al rodiu de15 y 20 minutos. Enantes d’emprimar llávase la batea y prepárase en tubu pal oru, quitándo-y el tapón y llenándolo con agua claro. Al acabar col sable, el competidor tien que zarrar el tubu col tapón y alzar la batea pa que’l xuráu apunte’l tiempu del competidor. Al terminar el tiempu de batéu tolos participantes que nun alcen la so batea tán descalificaos.

La clasificación algámase per aciu del tiempu de batéu. El primeru ye’l que fai un tiempu total menor. Amás, la perda de cada pebida supón una penalización de 5 minutos que s’añaden al tiempu usáu.

Tamién se dan otru tipu de campeonatos, como ye’l batéu d’oru llibre. Esti campeonatu consiste na busca d’oru nun ríu. El tiempu de la competición pue durar un día enteru; el ganador ye aquél qu’algama mayor númberu de pebides y de mayor tamañu. Esti campeonatu tien les torgues de ser más difícil de controlar, y limítase a ríos con oru, anque llega a ser más prestosu.

Dende l’entamu de la civilización, nel occidente d’Asturies esplotáronse, ente otros recursos naturales, los minerales esistentes nestes tierres. Dientro d’estos minerales cumple destacar lo más buscao polos pueblos primitivos: L’oru.

El batéu ye l’aprovechamientu de los arrastres que fai l’agua de les piedres de cuarzu qu’en metá de les tormentes y les corrientes d’agua ruempen lliberando les pebides d’oru que lleven nel so interior. Posteriormente estes pebides son llaminaes polos regodones de los calces de los ríos, quedando separtaes en munches y pequeñes partícules, que pol so gran pesu van posándose nos fondos de los saltos d’agua, nes ensenaes de los recovecos y en cualesquier sitiu axeitáu onde, lloñe de les fuertes corrientes, el sable permita la filtración d’esti apreciáu mineral.

El batéu d’oru yera una mena d’esplotación del mineral de mou artesanal, qu’anguaño, pola mor de la so poca rentabilidá, pasa a ser un atractivu turísticu y deportivu, recomendáu como relás frente al estrés del nuesu tiempu.