Bon gobiernu y grupos d´interés
- Bon gobiernu
- ¿Qué abarca’l bon gobiernu?
- ¿Qué papel desempeña’l Conseyu?
- Grupos d’interés
- ¿Cómo regula la Llei l’actividá de los grupos d’interés?
- ¿Qué papel desempeña’l Conseyu?
Bon gobiernu
La Llei del Principáu d´Asturies 8/2018, de 14 de setiembre, establez los principios y regles de bon gobiernu qu’han observar los cargos altos del Principáu d’Asturies, completando les previsiones básiques de la Llei 19/2013, de 9 d´avientu.
¿Qué abarca’l bon gobiernu?
El réxime de bon gobiernu abarca, ente otres materies:
- Los principios d’actuación de los cargos altos, qu’han exercer les sos funciones con profesionalidá, integridá, oxetividá, competencia, responsabilidá, bona fe y llealtá institucional, al serviciu del interés xeneral y con respetu a les regles de tresparencia, imparcialidá y responsabilidá.
- El Códigu de conducta de los cargos altos, que desenvuelve, complementa y concreta los principios de bon gobiernu y los procedimientos p’aplicalos.
- La idoneidá pal exerciciu del cargu y la declaración responsable correspondiente primero de la toma de posesión.
- La prevención de la corrupción, pente medies de, ente otros instrumentos, el Plan de Prevención de la Corrupción, qu’incluye la identificación y evaluación de riesgos y les midíes destinaes a mengualos.
- La prevención y xestión de los conflictos d’intereses, incluyida la obligación d’abstención cuando los intereses personales del cargu altu puedan afectar al exerciciu oxetivu y imparcial de les sos funciones.
- El réxime d’incompatibilidaes y les limitaciones a lo llargo y depués del exerciciu del cargu, amás de les obligaciones relatives a participaciones societaries y a la xestión de determinaos valores y activos financieros.
- Les declaraciones y rexistros d’actividaes y de bienes y derechos patrimoniales de los cargos altos, nos términos y col réxime de publicidá o reserva establecíos pola Llei.
- El control del cumplimientu d’estes obligaciones, incluyíu l’exame de la situación patrimonial de los cargos altos n’acabando’l mandatu y el réxime d’infracciones y sanciones.
¿Qué papel desempeña’l Conseyu?
El Conseyu de Tresparencia y Bon Gobiernu del Principáu d’Asturies garantiza, nel ámbitu de les sos competencies, la observancia de les disposiciones en materia de bon gobiernu.
El Plenu aprueba’l Plan de Prevención de la Corrupción y formula la propuesta del Códigu de conducta de los cargos altos. La Oficina de Bon Gobiernu y Llucha contra la Corrupción ellabora la propuesta del Plan y mira pola so execución, xestiona los Rexistros d’Actividaes y de Bienes y Derechos Patrimoniales de cargos altos y exerce les funciones restantes que la Llei-y atribuye en materia de conflictos d’intereses, incompatibilidaes, control patrimonial y instrucción de procedimientos sancionadores.
Grupos d´interés
La Llei 8/2018 considera grupos d’interés a les persones físiques o xurídiques y a les organizaciones que se dediquen profesionalmente, como toa o parte de la so actividá, a influyir directa o indirectamente nos procesos d’ellaboración de polítiques o disposiciones normatives, na so aplicación o na toma de determinos de l’Alministración del Principáu d’Asturies y del so sector públicu, nos términos establecíos pola Llei.
¿Cómo regula la Llei l’actividá de los grupos d’interés?
La Llei establez dellos instrumentos dirixíos a garantizar la tresparencia y el control de la so intervención na actuación pública:
- Un Rexistru de grupos d’interés, de calter públicu, adscritu a la Dirección Xeneral competente en materia de participación ciudadana. La Llei prevé la inscripción nél de los suxetos abarcaos nel so ámbitu d’aplicación y remite a desenvolvimientu reglamentariu la regulación de la so organización y funcionamientu. El Rexistru nun s’atopa anguaño en funcionamientu y la so creación y xestión efectiva nun correspuenden al Conseyu de Tresparencia y Bon Gobiernu del Principáu d’Asturies..
- Un Códigu de conducta, qu’ha acompañar a la inscripción y recoyer, ente otros compromisos, l’actuación honesta y el suministru d’información completa, correcta, actualizada y non engañosa.
- L’espediente de buelga na actuación pública, destináu a dexar constancia de los cambeos introducíos nuna norma, plan, programa d’actuación o política pública como consecuencia de la intervención de grupos d’interés.
- Un réxime d’infracciones y sanciones pa los incumplimientos previstos na propia Llei.
¿Qué papel desempeña´l Conseyu?
El Conseyu de Tresparencia y Bon Gobiernu del Principáu d’Asturies tien ente les sos mires garantizar la observancia de les disposiciones sobre grupos d’interés, dientro del ámbitu de les competencies que-y atribuye la Llei 8/2018.
Esta función nun abarca nin la creación nin la xestión del Rexistru de grupos d’interés, que s’atopa adscritu a la dirección xeneral competente en materia de participación ciudadana.
Nel ámbitu sancionador, correspuende a la Oficina de Bon Gobierno y Llucha contra la Corrupción la instrucción de los procedimientos previstos na Llei, mentes que la incoación y la imposición de les sanciones correspuenden a los órganos que determina’l so artículu 57.