Canal esterna de llucha contra la corrupción

 

Canal Esterna de Llucha contra la Corrupción del Conseyu de Tresparencia y Bon Gobiernu del Principáu d’Asturies

La Oficina de Bon Gobiernu y Llucha contra la Corrupción del Conseyu recibe informaciones sobre conductes, fechos o situaciones de los que puedan derivase illícitos alministrativos o penales rellacionaos cola corrupción, o comportamientos contrarios a la integridá pública (artículos 59 a 62 de la Llei del Principáu d’Asturies 8/2018, de 14 de setiembre, de Tresparencia, Bon Gobiernu y Grupos d’Interés). No non previsto pola Llei 8/2018, la tramitación va afacese a la llexislación básica estatal aplicable, en particular a la Llei 2/2023, de 20 de febreru, reguladora de la protección de les persones qu’informen sobre infracciones normatives y de llucha contra la corrupción, y a la Llei 39/2015, de 1 d’ochobre, del Procedimientu Alministrativu Común de les Alministraciones Públiques. Esta canal funciona con calter provisional mentes s’implanta’l sistema electrónicu definitivu.

 

 

¿Sobre quién pue informar?

Sobre l’Alministración del Principáu d’Asturies, los sos organismos y entes públicos dependientes o vinculaos, y les sociedaes mercantiles y fundaciones nes qu’aquella tenga directa o indirectamente participación mayoritaria o dominiu efectivu, cuando seyan designaes con alcuerdu previu del Conseyu de Gobiernu o polos sos propios órganos de gobiernu. Si la información se refier a fechos ayenos al ámbitu d’actuación de la Canal, el Conseyu, cuando proceda, va unviala a l’autoridá, entidá o organismu que considere competente y va comunicalo a la persona informante si facilitó un mediu de contactu y nun arrenunció a recibir comunicaciones.

 

 

¿Quién pue informar?

Cualquier persona, física o xurídica. Nun ye menester tener rellación llaboral o profesional cola entidá. Quien informa nun adquier la condición d’interesáu namás por presentar la información, pero pue solicitar que lu informen sobre l’estáu de la tramitación y sobre la so resolución.

 

 

¿Cómo pue informar?

  • Per corréu electrónicu a canalexterno. ctbg-pa@asturias.org
  • Per corréu postal, en sobre zarráu dirixíu a la Oficina de Bon Gobiernu y Llucha contra la Corrupción, Conseyu de Tresparencia y Bon Gobiernu del Principáu d’Asturies, C/ Rosal, 7, 33009 Uviéu.
  • Per teléfonu o mensaxería de voz nel númberu [pendiente d’habilitación]. Les comunicaciones verbales van documentase d’alcuerdu cola Llei 2/2023, depués d’informar sobre la so grabación y sobre’l tratamientu de los datos personales.
  • En persona, solicitando una reunión al traviés del corréu electrónicu que se va celebrar nun plazu máximu de siete díes.

 

 

¿Puedo informar ensin identificame?

Sí. Nun ye obligatorio facilitar nome nin firma. Tenga en cuenta que’l corréu electrónicu muestra la dirección d’unviu y que los documentos pueden contener nomes o datos ocultos que lu identifiquen. Si nun facilita nengún mediu de contactu, la so información va tramitase igualmente, pero nun vamos poder acusar recibu nin informalu del resultáu.

 

 

¿Qué garantíes tengo?

La persona informante tien derechu a la confidencialidá y a la indemnidá nos términos establecíos pola Llei 8/2018. Cuando la comunicación nun seya anónima, la so identidá va caltenese reservada y namás va poder comunicase a l’autoridá xudicial, al Ministeriu Fiscal o a l’autoridá alministrativa competente nel marcu d’una investigación penal, disciplinaria o sancionadora, coles garantíes previstes llegalmente. L’accesu a les informaciones va quedar restrinxíu al personal del Conseyu autorizao espresamente pal so tratamientu. Les persones físiques incluyíes nel ámbitu d’aplicación de la Llei 2/2023 van poder acoyese, amás, a les midíes de protección previstes nesa Llei, cuando se dean los requisitos establecíos llegalmente.

 

 

¿Qué pasa depués?

Desque se reciba la información, el Conseyu va acusar recibu nun plazu non superior a cinco díes hábiles, sacante que la persona informante arrenunciare espresamente a recibir comunicaciones o que l’acuse pueda comprometer razonablemente la protección de la so identidá. Va realizase un análisis preliminar y va tomase’l determín sobre la so almisión nun plazu non superior a diez díes hábiles dende qu’entre nel rexistru. Desque s’almita la información, la Oficina va poder practicar les actuaciones previes necesaries pa comprobar los fechos. Si aprecia nicios abondos, va dar treslláu al órganu competente pa empezar el procedimientu que correspuenda; si los fechos pudieren ser indiciariamente constitutivos de delitu, va unviase al Ministeriu Fiscal nos términos previstos llegalmente. En casu contrariu, va alcordar motivadamente l’archivu. El plazu pa rematar les actuaciones de la Canal y dar respuesta a la persona informante, si ye’l casu, nun va ser superior a trés meses dende la entrada en rexistru de la información.