Publicidá activa
La publicidá activa ye la obligación de publicar d’oficiu, ensin falta de solicitú previa, la información que la llexislación de tresparencia determina. La so mira ye facilitar el conocimientu de l’actividá pública y facer posible’l control de l’actuación de los poderes públicos.
La Llei del Principáu d´Asturies 8/2018, de 14 de setiembre, esixe que la información oxetu de publicidá activa seya, ente otres condiciones, actualizada, veraz, coherente, estructurada, concisa, completa, segura, d’accesu fácil, reutilizable, entendible y clara. Con calter xeneral, tien que s’actualizar cada trés meses, sacante qu’una norma estableza otru plazu.
¿Qué información ha publicase?
La llexislación de tresparencia establez un conxuntu d’informaciones que los suxetos obligaos tienen que facer públiques ensin falta de que se soliciten enantes. Ente otres, abarca:
- Información institucional, organizativa y de planificación: funciones, normativa aplicable, estructura y organización, responsables de les unidaes, llistes de puestos de trabayu, procesos de selección y provisión de personal, planes y programes y, cuando proceda, información relativa a cargos y órganos altos de gobiernu.
- Información de relevancia xurídica: directrices, instrucciones y criterios con efectos xurídicos, proyectos normativos y documentación de la so tramitación, informes xurídicos preceptivos y catálogu de procedimientos alministrativos, nos términos establecíos llegalmente.
- Información económica, presupuestaria y estadística: contratos, convenios, subvenciones y ayudes públiques, presupuestos y la so execución, cuentes anuales, retribuciones, información financiera y patrimonial, plazu mediu de pagu a provisores y información sobre la calidá de los servicios.
- Otres informaciones d’interés públicu: información sobre los servicios emprestaos y les sos condiciones d’accesu y canales d’atención, amás d’aquella que se consulte con más frecuencia o seya oxetu davezu de solicitúes d’accesu.
El conteníu concretu d’estes obligaciones y el so algame pa cada suxetu determínense nos artículos 6 a 9 de la Llei del Principáu d´Asturies 8/2018, de 14 de septiembre, y nos artículos 6 a 8 de la Llei 19/2013, de 9 d´avientu.
Control y siguimientu
El cumplimientu d’estes obligaciones ta sometíu a control y siguimientu. Nel ámbitu de les sos competencies, el Plenu del Conseyu exerce funciones de control y siguimientu y evalúa’l grau d’aplicación de la Llei, mentes que la Presidencia vela pol cumplimientu de les obligaciones de publicidá activa y pue efectuar los requerimientos previstos espresamente nella.
Si la información que busques nun ta publicada o necesites información más detallada, puedes solicitala exerciendo’l derechu d’accesu a la información pública.