Quién somos
El Conseyu de Tresparencia y Bon Gobiernu del Principáu d’Asturies ye la institución independiente de garantía de la tresparencia, el bon gobiernu y la integridá pública n’Asturies. Promueve la publicidá activa, protexe’l derechu d’accesu a la información y desenvuelve funciones de prevención y llucha contra la corrupción.
El Conseyu de Tresparencia y Bon Gobiernu del Principáu d’Asturies ye un ente públicu con personalidá xurídica propia, reguláu pola Llei 8/2018, de 14 de setiembre, de Tresparencia, Bon Gobiernu y Grupos d’Interés, y sometíu na so actuación al Derechu alministrativu.
Ye la institución independiente de garantía de la tresparencia, el bon gobiernu y la integridá pública n’ámbitu de les sos competencies.
Los sos fines principales son
- promover la tresparencia de l’actividá pública;
- mirar pol cumplimientu de les obligaciones de publicidá activa;
- salvaguardar l’exerciciu del derechu d’accesu a la información pública;
- garantizar la observancia de les disposiciones en materia de bon gobiernu y grupos d’interés;
- ayudar, al traviés de la Oficina de Bon Gobiernu y Llucha contra la Corrupción, a la prevención y llucha contra’l fraude, la corrupción y otres conductes contraries a la integridá pública, amás de recibir y tramitar les informaciones que correspuendan n’ámbitu de les sos competencies.
El Conseyu exerce les sos funciones con autonomía funcional plena y independencia absoluta. Nel so Plenu nun existe representación del Conseyu de Gobiernu del Principáu d’Asturies.
Pal cumplimientu de los sos fines, el Conseyu cunta con una sección presupuestaria propia y dispón de personal funcionario del Principáu d’Asturies.
La so configuración institucional respuende asina a una finalidá doble: garantizar los derechos de la ciudadanía en materia de tresparencia y accesu a la información pública y promover una actuación pública.