Tresparencia y derechu d´accesu
- El derechu d´accesu a la información pública
- ¿Cuántu tiempu tien l’Alministración pa responder?
- ¿Cuándo puedo reclamar?
- ¿Qué plazu tengo pa reclamar?
- Importante: ¿quién resuelve anguaño les reclamaciones n’Asturies?
- ¿Ónde puedo presentar la reclamación?
- El Conseyu del Principáu ayúdate
Toles persones tienen derechu a acceder a la información pública. Si una solicitú d’accesu se deniega, s’inalmite, s’atiende namás parcialmente o nun tien respuesta en plazu, pue presentase una reclamación.
Anguaño, pola mor del conveniu soscritu col Principáu d’Asturies, la xestión y resolución d’estes reclamaciones correspuende al Conseyu de Tresparencia y Bon Gobiernu estatal. El Conseyu de Tresparencia y Bon Gobiernu del Principáu d’Asturies da información, orientación y apoyu a la ciudadanía nel exerciciu d’esti derechu.
El derechu d’accesu a la información pública
Toles persones tienen derechu a acceder a la información pública, entendiendo como tala los conteníos o documentos, cualquiera que seya’l so formatu o soporte, que tean en poder de les Alministraciones y demás suxetos obligaos y s’ellaboraren o adquirieren nel exerciciu de les sos funciones.
La solicitú ha dirixise al órganu o entidá que tenga la información. Ha dexar identificar a la persona solicitante y la información que se pide y indicar unes señes de contactu. Nun ye menester esplicar o xustificar por qué se solicita la información..
Con calter general, l’accesu ye gratuitu, ensin perxuiciu de los costos que, en casos determinaos, pueda xenerar la emisión de copies o la tresformación de la información a un formatu distintu.
¿Cuántu tiempu tien l’Alministración pa responder?
La resolución ha notificase, con calter xeneral, nel plazu máximu d’un mes dende que la solicitú la recibiere l’órganu competente pa resolver.
Cuando’l volume o la complexidá de la información lo precisen, esti plazu pue ampliase otru mes, depués de comunicá-ylo a la persona solicitante.
Si trescurre’l plazu ensin que se notificare una resolución, la solicitú entiéndese desestimada, ensin qu’eso quite a l’Alministración la so obligación de resolver.
¿Cuándo puedo reclamar?
Pue presentase una reclamación cuando la solicitú d’accesu:
- s’inalmitiere;
- se denegare total o parcialmente;
- s’atendiere de manera que nun satisfaiga la solicitú formulada;
- o nun recibiere respuesta dientro del plazu llegal.
La reclamación ye gratuita y tien calter potestativu: constituye una vía de garantía previa a la impugnación énte la xurisdicción contencioso-alministrativa.
¿Qué plazu tengo pa reclamar?
Si existe resolución espresa, la reclamación ha presentase, con calter xeneral, nel plazu d’un mes cuntáu dende’l día depués de notificase. Si la solicitú nun recibiere respuesta dientro del plazu llegal y se produz silenciu alministrativu, la reclamación pue presentase a partir d’esi momentu ensin tope temporal mentes nun exista resolución espresa.
El plazu máximu establecíu llegalmente pa resolver y notificar la reclamación ye de trés meses.
Importante: ¿quién resuelve anguaño les reclamaciones n’Asturies?
La Llei 8/2018 atribuye al Conseyu de Tresparencia y Bon Gobiernu del Principáu d’Asturies la garantía del derechu d’accesu a la información pública. Sicasí, anguaño atópase vixente un conveniu col Conseyu de Tresparencia y Bon Gobiernu estatal pol que se-y atribuye la competencia pa la xestión y resolución de les reclamaciones nos términos previstos nel propiu conveniu.
El conveniu, soscritu’l 13 de mayu del 2026 y publicáu nel BOE de 21 de mayu del 2026, atribuye al Conseyu estatal competencia pa resolver les reclamaciones relatives a l’Alministración del Principáu d’Asturies y el so sector públicu, amás d’a les entidaes locales asturianes y el so sector públicu. Esta atribución nun supón arrenunciu de la competencia que correspuende a la comunidá autónoma; el conveniu dispón que se tresfieren namás la xestión, resolución y notificación de les reclamaciones que se sustancien.
¿Ónde puedo presentar la reclamación?
La reclamación pue presentase:
- directamente al traviés de la sede electrónica del Conseyu de Tresparencia y Bon Gobiernu estatal;
- en cualquiera de los rexistros públicos habilitaos llegalmente;
- o al traviés de los medios restantes almitíos pola llexislación de procedimientu alministrativu.
El conveniu prevé espresamente que les reclamaciones puedan presentase en cualquier rexistru públicu y regula la so remisión depués al Conseyu estatal.
El Conseyu del Principáu ayúdate
Anque la tramitación y resolución de les reclamaciones correspuenda anguaño al Conseyu estatal, el Conseyu de Tresparencia y Bon Gobiernu del Principáu d’Asturies da información, orientación y apoyu a la ciudadanía pa facilitar l’exerciciu efectivu del derechu d’accesu a la información pública.
Puedes dirixite al Conseyu del Principáu pa:
- resolver duldes sobre l’exerciciu del derechu d’accesu y el procedimientu de reclamación;
- recibir orientación sobre ónde y cómo presentar una reclamación;
- identificar, cuando seya posible, l’órganu al que se tien que dirixir una solicitú;
- y presentar una reclamación pa la so remisión al Conseyu de Tresparencia y Bon Gobiernu estatal, competente actualmente pa la so tramitación y resolución.
Cuenta de corréu electrónicu: transparencia.ctbg-pa@asturias.org