La ruta dixital que convierte una idea nun proyectu


 

Entamar daqué empieza muncho primero d’abrir les puertes d’un negociu. Empieza con una idea que precisa información, orientación y conocer los trámites necesarios pa rellacionase cola Alministración.

Asturies cunta con recursos y servicios de sofitu empresarial que faciliten l’accesu a la información y la orientación precises pa dar los primeros pasos nun proyectu.

Toa idea precisa un puntu de partida. La Oficina d’Atención a les Empreses de miPrincipado, ufierta información y orientación sobre los trámites, requisitos y pasos previos a la creación d’un negociu.

Oficina d’Atención a Empreses

Espaciu de referencia pa les empreses, pymes y persones autónomes del Principáu d’Asturies. Ye’l puntu de contactu, información y asesoramientu pa tolos aspectos tocante a tramitaciones cola Alministración.

L’oxetivu de la Oficina ye sofitar y ameyorar la economía y el texíu empresarial ufiertando soluciones y mecanismos de sofitu pa resolver nel menor tiempu posible trámites.

Dende la Oficina d’Atención a Empreses de miPrincipado ufiertamos información y orientación pa facilitar les tos xestiones cola Alministración:

  • Orientación sobre trámites alministrativos: información sobre los trámites y requisitos que tien que cumplir la empresa énte l’Alministración.
  • Información y orientación a lo llargo de la tramitación: orientación sobre los pasos que tienen que siguise nos procedimientos alministrativos y sobre les canales disponibles pa realizar consultes, efectuar xestiones o dirixise al órganu competente.
  • Atención personalizada énte dificultaes alministratives: análisis de situaciones particulares y orientación sobre les víes disponibles pa tratar les dificultaes que puedan surdir a lo llargo de la tramitación.

Puedes contactar cola Oficina al traviés de:

  • Teléfonu de contactu: 984 018 862.
  • Corréu electrónicu: oficina.dgempresas@asturias.org
  • Reuniones presenciales con cita previa, na cai Santa Susana, 29 Baxu (33007) Uviéu.
  • Formulariu de contactu

Ayudes y financiamientu pa impulsar la to idea

Desque s’estableza la estructura del to proyectu, llega’l momentu de buscar financiamientu. Asturies ufierta delles víes adaptaes a les necesidaes de cada perfil:

  • SEKUENS l’axencia de desenvolvimientu económicu del Principáu cunta con llinies de financiamientu específiques pa la creación d’empreses.
  • Centru Européu d’Empreses y Innovación del Principáu d’Asturies (CEEI Asturies), entidá ensin afán d’arriquecimientu que sofita l’empiezu y crecimientu d’empreses innovadores y de base tecnolóxica.
  • Asturgar ufierta soluciones financieres pa pymes, entamadores y persones autónomes.
  • Fondu Européu de Desenvolvimientu Rexonal (Fondos FEDER) impulsa proyectos vinculaos a la innovación y la investigación.

Formación y acompañamientu pa dar forma al to proyectu

Valnalón, empresa pública de la Conseyería de Ciencia, Industria y Emplegu. La ‘Cadena de Formación pa Entamar’ desenvuélvese en dos ámbitos:

  • Educación Entamadora, fomenta l’espíritu entamador en tolos niveles educativos.
  • Promoción Entamadora, cola mira de la creación, el desenvolvimientu y l’afianzamientu empresarial.

Pero la innovación entamadora nun queda equí. Asturies crea y arriquez esti ámbitu con dellos entes qu’impulsen les idees de negocios pa que se conviertan en realidá. Amás, siguiendo esta iniciativa d’innovación, Asturies cunta con AsDIH, que conecta a entamadores con empreses, centros tecnolóxicos y talentu especializáu.

Xestiones alministratives nun únicu portal

Dende miPrincipado ye posible acceder a trámites vinculaos a l’actividá entamadora: solicitú d’ayudes, xustificación de subvenciones y comunicaciones cola Alministración autonómica. Tol procesu pue siguise dende un mesmu espaciu dixital y dende cualquier sitiu.

Esti ecosistema facilita qu’empreses y persones entamadores y autónomes dispongan de más tiempu pa desenvolver el so proyectu, facilitando les xestiones alministratives qu’enantes suponíen una dedicación más intensa. Por eso, ente otres coses, facilítase l’accesu a la información, organizándose de manera clara por temática y perfil p’atopar rápidamente los recursos afayadizos según la etapa del negociu.

Convertir una idea en proyectu empresarial precisa información fiable, financiamientu amañosu y acompañamientu. Daqué de lo que miPrincipado s’ocupa.