AsDIH: conectando tecnología, innovación e industria en Asturias
N’Asturies, les empreses tienen el sofitu d’ Asturies Dixital Innovation Hub (AsDIH), una iniciativa impulsada pol Gobiernu del Principáu d´Asturies y coordinada pola Axencia SEKUENS, que forma parte de la rede europea de centros d´innovación dixital.
Más qu’un conxuntu de servicios tecnolóxicos, AsDIH actúa como un puntu d’alcuentru pa facilitar la collaboración y l’intercambéu de conocimientu ente:
- Empreses.
- Centros tecnolóxicos.
- Axentes d´innovación.
- Provisores de soluciones dixitales.
El so oxetivu ye conectar capacidaes, averar recursos especializaos y favorecer la tresferencia de conocimientu al texíu empresarial asturiano, ayudando a les organizaciones a identificar oportunidaes, acceder a tecnoloxíes nueves y reforciar la so competitividá.
Accedi al portal web d´AsDIH
¿Qué ye AsDIH?
AsDIH ye un centru d’innovación dixital qu’ayuda a les empreses pequeñes y medianes (PYMES) a esperimentar con soluciones innovadores primero de realizar inversiones, reducir riesgos y favorecer l’adopción de ferramientes dixitales nueves. Esti hub naz como un ecosistema que pon en valor les capacidaes tecnolóxiques disponibles n’Asturies pa facilitar l’accesu de les empreses a tecnoloxíes avanzaes.
La participación de l´Axencia SEKUENS como entidá coordinadora resulta clave p’articular l’ecosistema, conectar a los distintos axentes implicaos y facilitar l’accesu a los recursos disponibles. Gracies a esta coordinación, les empreses pueden atopar una ventana única dende la qu’aportar a recursos, asesoramientu y equipamientos tecnolóxicos que promueven l’adopción de soluciones innovadores.
Servicios pa impulsar la tresformación dixital
Al traviés del so catálogu de servicios especializaos, AsDIH acompaña a les empreses en fases variaes del so procesu de tresformación dixital. Ente los principales servicios destaquen:
- Asesoramientu inicial empobináu a identificar tecnoloxíes, analizar alternatives y estudiar la so viabilidá.
- Ensayu y esperimentación al traviés de pruebes de conceptu, prototipos y validaciones tecnolóxiques.
- Formación con acciones empobinaes a ameyorar les competencies dixitales y tecnolóxiques.
- Financiamientu y conexón col ecosistema facilitando información sobre ayudes, subvenciones y oportunidaes de collaboración.
Estos servicios tán orientaos sobre manera a ameyorar los procesos de les empreses y, por eso, a reforciar la so competitividá nel mercáu actual.
Tecnoloxíes y recursos pa esperimentar
L’actividá d’AsDIH céntrase n’ámbitos tecnolóxicos que yá tán tresformando la industria. Ente ellos, destaquen la fabricación aditiva, l’análisis de datos y les tecnoloxíes de visión artificial que son aplicables a sectores y actividaes variaos.
Pa sofitar estos ámbitos tecnolóxicos, el hub tien una rede d’equipamientos, ente los que s’incluyen recursos colos que les pymes pueden evaluar tecnoloxíes nueves en redolaes controlaes primero d’incorporales a la so actividá diaria como:
- Llaboratorios.
- Impresores 3D.
- Sistemes de simulación.
- Tecnoloxíes de robótica.
- Infraestructures d’esperimentación.
- Plataformes d’Internet de les Coses (IoT).
- Soluciones avanzaes d’análisis de datos.
Ente otros recursos, AsDIH cunta con impresores 3D coles que les empreses pueden xenerar prototipos de productos físicos y validar la so viabilidá.
Casos reales que yá tán tresformando la industria asturiana
L’impactu d’AsDIH pue apreciase al traviés de les esperiencies y casos d’usu desenvueltos en dellos sectores. Empreses de tamaños variaos, procedentes d’ámbitos como la industria, l’alimentación, la inxeniería, la xestión forestal, la robótica o’l reciclaxe yá incorporaron tecnoloxíes dixitales p’ameyorar procesos, optimizar recursos o desenvolver productos nuevos.
Ente les soluciones aplicaes destaquen la visión artificial, la fabricación aditiva, los ximielgos dixitales, la conectividá intelixente, l’usu de drones y sensores o l’análisis avanzáu de datos: esperiencies que muestren cómo la esperimentación dixital contribuye a ameyorar la toma de decisiones, aumentar la eficiencia y xenerar oportunidaes pa crecer nel mercáu.
¿Cómo acceder al ecosistema d’AsDIH?
Pa facilitar esti acompañamientu, ye posible contactar con AsDIH pa solicitar información sobre los servicios disponibles y esplorar llinies de collaboración y participación al traviés de:
- La Oficina Técnica del hub, allugada nel Parque Científicu y Tecnolóxicu de Xixón, na cai Profesor Potter, 72, oficinas 9 y 10.
- El formulariu contacta con nós.
- El teléfonu 984 684 590 (ext. 2919).
- El corréu electrónicu: asdih@sekuens.es.
Amás, toles persones interesaes en tar al día de les actividaes, convocatories, eventos y novedaes pueden soscribise a la newsletter de SEKUENS asociada al hub o siguilo nes sos redes sociales (LinkedIn, X y Youtube).