Llingua azul n´Asturies

La llingua azul ye una enfermedá vírica qu’afecta a rumiantes, tanto domésticos como monteses, y que se tresmite pola picadura de delles especies de mosquitu. La especie ovina ye en xeneral la más afectada, mentes que bovinos y el caprinos nun avecen mostrar signu clínicu nengún de la enfermedá y pueden actuar como portadores.

El periodu d’incubación ye de 5 a 10 díes.

Nun ye una zoonosis, esto ye, nun se tresmite a les persones polo que ye seguro consumir lleche, carne y los sos derivaos. Tampoco s’establecen restricciones de movimientu a les esplotaciones con casos, namás al animal afectáu.

Llaboratoriu nacional de referencia: Llaboratoriu Central de Veterinaria d’Algete.

Enfermedá de categoría D+E dende’l 15 de xunetu del 2026 (Reglamentu d’Execución UE 2026/169 de la Comisión de 26 de xineru del 2026)

Asturies ye zona ensin estatus, d’alcuerdu a lo que s’establez na Resolución de 12 de marzu de 2025, de la Dirección Xeneral de Sanidá de la Producción Agroalimentaria y Bienestar Animal, pola que s’aplica la Orde APA/229/2025, de 10 de marzu, pola que s’establecen midíes específiques de protección sobre la llingua azul.

El Programa de Vixilancia pal 2026 va basase na vixilancia pasiva col oxetivu de detectar precozmente la enfermedá. Igualmente, caltiénse’l programa de vixilancia entomolóxica con estaciones permanentes de captura de vectores de cara a siguir declarando’l PEL y flexibilizar los requisitos de movimientu nesti periodu. La vacunación sigue calteniéndose como la ferramienta preventiva más eficaz pa menguar la tresmisión y l’impactu sanitariu y productivu de la Llingua Azul nes esplotaciones de rumiantes.

Según establez l’artículu 5 de la Llei 8/2003, de 24 d’abril, de sanidá animal, toa persona física o xurídica, pública o privada, ta obligada a comunicar a l’autoridá competente, na forma y plazu establecíos, tolos focos y sospeches d’enfermedaes de les incluyíes na llista d’enfermedaes de declaración obligatoria y de cualquier otra que pol so calter epizoóticu, o pola so especial virulencia, gravedá extrema o  difusión rápida impliquen un peligru potencial de contaxu pa la población animal, la salú pública o pal mediu ambiente. No referente a la LA y a la EHE, d’alcuerdo colo establecío en Llei de sanidá animal, tanto los veterinarios como los titulares de les esplotaciones tán obligaos a comunicar a les autoridaes competentes les sospeches clíniques que pudieren detectar.

Que los animales tean a cubiertu, sobre manera nes hores de máxima actividá del vector (amanecer y atapecer).

• Que l’agospiamientu de los animales se faiga en recintos que dispongan de malles con diámetru de pasu igual o inferior a 5 mm en ventanes, puertes y otres abertures posibles, enllenando estes malles con insecticides que tengan amás efectu repelente.
• Desinsectación: Encamiéntase a ganaderos y ganaderes que lleven a cabu la desinsectación de los animales (tien qu’anotase nel llibru de tratamientos de la esplotación indicando’l crotal del animal desinsectáu), con una frecuencia d’usu axustada a la duración de la efectividá del productu, respetando siempre les condiciones de bienestar animal y l’usu d’insecticides y repelentes en medios de tresporte y instalaciones, amás del usu d’insecticides y larvicides pal control de les posibles zones de cría.

Consulta la llista de productos autorizaos pol Ministeriu d´Agricultura Pesca y Alimentación.

Pa los movimientos nacionales, les normes aplicables a los movimientos d’animales de les especies sensibles a la llingua azul y de la so espelma, óvulos y embriones, tán establecíes na  Orden APA/229/2025 pola que s’establecen midíes específiques de protección sobre la llingua azul.

Les condiciones relatives a la llingua azul pa los bovinos y ovinos con destín a España dende un Estáu miembru o una zona non indemne de llingua azul, d’alcuerdu col artículu 43 del Reglamentu Delegáu 2020/689, de 17 d’avientu del 2019, pueden atopase descrites nesti protocolu.

Les condiciones establecíes pol restu d’Estaos Miembros puen atopase nesti enllaz: Bluetongue (europa.eu).

La vacunación considérase la ferramienta principal nel control de la enfermedá, al evitar la circulación del virus de la Llingua Azul.

Como nun existe inmunidá cruciada ente serotipos del virus de la Llingua Azul, resulta imprescindible que los animales susceptibles tean inmunizaos frente a tolos serotipos circulantes en cada campaña epidemiolóxica.

La vacunación ha facese con periodicidá anual frente a los serotipos presentes nel territoriu, y han administrase conforme a les condiciones autorizaes y a les instrucciones establecíes pol fabricante. La planificación vacunal habrá garantizar que la inmunidá tea  establecida dafechu primero del periodu d’actividá del vector. Con calter orientativu, recomiéndase que los animales tean vacunaos correctamente, como fecha límite, ente los meses d’abril y mayu. En tou casu, el momentu concretu de vacunación ha determinalu’l veterinariu responsable de la esplotación, teniendo en cuenta la situación epidemiolóxica local, el sistema productivu y el calendariu reproductivu del rebañu.

N’esplotaciones onde se detectare circulación viral, recomiéndase la vacunación de los animales que nun presenten sintomatoloxía clínica, por cuenta de que:

• La infección nun se produz de manera simultánea en tolos animales.

• N’animales en fase d’incubación, la vacunación pue contribuir a menguar la gravedá clínica y la diseminación viral.

Recomiéndase, amás, que los animales s’alcuentren desparasitaos correctamente primero de vacunase, cola mira d’optimizar la respuesta inmunitaria.

IMPORTANTE: La Conseyería de Mediu Rural y Política Agraria ufierta ayudes económiques destinaes a compensar los gastos d´adquisición de vacunes voluntaries frente a enfermedaes animales de declaración obligatoria.

La sospecha d’una reacción adversa depués de l’aplicación de la vacuna de la llingua azul, lo mesmo que con cualquier otra melecina veterinaria, ha notificase al traviés del "Sistema Español de Farmacovixilancia de Melecines Veterinaries" por tolos profesionales veterinarios que tengan conocencia d’ella na so práctica habitual.

La comunicación d’una sospecha de reacción adversa ha facese al traviés d’un formulariu normáu tarxeta verde que,desque se rellene, tien que se mandar a la AEMPS (Axencia Española de Melecines y Productos Sanitarios), bien per corréu electrónicu, fax o corréu postal. De la mesma, tanto l’informe del veterinariu clínicu como la xustificación de la comunicación al sistema de farmacovixilancia van presentase nes Oficines Comarcales Agraries del Principáu d’Asturies pal so rexistru y constancia.

Pue atopar más información sobre farmacovixilancia de melecines veterinaries na páxina web de l´AEMPS

Les muestres (sangre con anticoagulante EDTA) van garrales los veterinarios clínicos, mandándoles al Llaboratoriu de Sanidá Animal de Xove con certificáu oficial colvet numberáu (númberu d’identificación oficial del animal solicitando PCR Llingua Azul y indicando amás la fecha na que se garró la muestra y la fecha de desinsectación previa que tien que ser como mínimu 14 díes primero). Les muestres pueden caltenese y mandase a temperatura ambiente si lleguen al llaboratoriu’l mesmu día de la toma de muestres. Pa plazos d’entrega superiores (que nun han superar les 72 hores) les muestres van caltenese y van mandase esfrecíes. Los tubos han dir identificaos correctamente y ordenaos nuna gradilla de poliestirenu (o asemeyáu). Les tases del Llaboratoriu de Sanidá Animal del Principáu d’Asturies tán bonificaes al 100 %.

Pa más información, pue consultase a los Servicios Veterinarios Oficiales de les Oficines Comarcales o Servicios Centrales n’Uviéu de la Dirección Xeneral de Ganadería, Conseyería de Mediu Rural y Política Agraria

• Información sobre la llingua azul publicada na páxina web del Ministeriu d´Agricultura, Pesca y Alimentación
• Consulta les notificaciones d´enfermedaes de los animales de declaración obligatoria
• Nota de prensa: Mediu Rural entama una campaña masiva, obligatoria y gratuita de vacunación del ganau al confirmar dos casos de llingua azul nuna esplotación de Xixón