Llingua azul n´Asturies
Ficha de la enfermedá
Trátase d’un virus emerxente qu’afecta sobre manera al ganáu bovino y que la so tresmisión ta asociada a vectores del xéneru Culicoides.
El virus Shamonda (SHAV) pertenez al xéneru Orthobunyavirus y forma parte del serogrupu Simbu, al que tamién pertenecen otros virus conocíos n’Europa, como’l virus de Schmallenberg (SBV) y el virus d’Akabane (AKAV).
Identificóse pela primer vez en Nixeria na década de 1960 y, hasta’l 2026, namás se detectare de forma esporádica en dellos países d’África y Xapón.
Anguaño, España caltién midíes de vixilancia pa detectar de forma temprana una introducción posible del virus nel nuestru territoriu.
La enfermedá aveza a presentar una evolución moderada, con mortalidá baxa pero con impactu potencial productivu y reproductivu sobre manera no bovino de lleche
Nun se considera una zoonosis y, polo tanto, nun afecta a les persones.
Periodu d’incubación: 2-5 díes
Situación epidemiolóxica n’Europa
A lo llargo del branu del 2026 confirmóse pela primer vez la presencia del virus Shamonda n’Europa Central, con detecciones primeres n’Alemaña, Suíza, Francia y Austria. Depués, notificáronse casos n’otros países europeos.
Los estudios fechos hasta la fecha dexaron identificar a lo menos dos variantes diferenciaes xenéticamente circulando n’Europa:
- Shamonda tipu 1, detectáu sobre manera en Suiza, Francia, el sur d´Alemaña y Austria.
- Shamonda tipu 2, detectáu en Bélxica, Países Baxos, el norte de Alemaña y el noroeste de Francia.
Ente los países con detecciones confirmaes atópense Suíza, Liechtenstein, Bélxica, Países Baxos y Francia, onde la circulación del virus confirmóse usando técniques de diagnósticu molecular.
Especies afectaes y tresmisión
El ganáu bovino ye la especie onde s’observó un mayor impactu sanitariu y productivu. Anque hai nicios d’infección n’otros rumiantes, la información disponible ye tovía poca.
La tresmisión produzse sobre manera pola picadura de dípteros del xéneru Culicoides. Hasta’l momentu, nun hai evidencies d’una tresmisión directa significativa ente animales. Amás, considérase posible la tresmisión de la madre al fetu a lo llargo de la xestación.
Signos clínicos
En ganáu bovino, les infecciones agudes pueden manifestase con:
- Fiebre.
- Diarrea.
- Disminución de la producción de lleche.
- Decayimientu xeneral.
La esperiencia observada nos países afectaos indica que la mengua de la producción láctea pue asitiase ente’l 10 % y el 20 %. La enfermedá presenta, polo xeneral, una mortalidá baxa, anque pue afectar a un númberu altu d’animales dientro d’una esplotación.
La esmolición principal céntrase nes consecuencies reproductives posibles cuando la infección se produz a lo llargo de fases determinaes de la xestación, pudiendo ocasionar albuertos, nacimientos muertos o malformaciones conxénites.
Nos más de los casos descritos, la recuperación de los animales adultos produzse de forma espontánea nun plazu aproximáu de dos a trés selmanes.
Diagnósticu
El diagnósticu faise con técniques de detección molecular, principalmente RT-PCR y PCR pa virus del grupu Simbu, con confirmación pente medies de secuenciación xenética cuando seya menester.
Les muestres aconseyaes incluyen:
- Sueru y sangre con EDTA n’animales con infección aguda.
- Cerebru, cerebelu, bazu y sangre en fetos albortaos, nacíos muertos o animales con malformaciones.
Midíes de vixilancia y prevención
España caltién un sistema de vixilancia pasiva cola mira de detectar de forma temprana la introducción posible del virus y evaluar el so impactu eventual sobre la cabaña ganadera nacional.
Anguaño nun hai una vacuna específica frente al virus Shamonda. Por eso, les midíes de prevención afítense fundamentalmente en:
- La vixilancia sanitaria y la detección precoz de casos compatibles.
- La comunicación inmediata de les sospeches a los Servicios Veterinarios Oficiales.
- L´aplicación de midíes de control de vectores.
- L´usu de repelentes y insecticides autorizaos.
- La llimpieza, desinfección y el refuerciu de la bioseguranza nes esplotaciones ganaderes.
La collaboración de ganaderos, veterinarios, organizaciones profesionales agraries y demás axentes del sector resulta esencial p’ameyorar el conocimientu de la enfermedá y favorecer una detección rápida de cualquier sospecha compatible.
Énte cualquier dulda o énte la observación de signos clínicos compatibles, contacte colos Servicios Veterinarios Oficiales.
La Dirección Xeneral de Ganadería y Sanidá Animal va continuar faciendo’l siguimientu de la evolución epidemiolóxica del virus Shamonda n’Europa y va tener informáu al sector sobre cualquier novedá relevante pa la sanidá animal y l’actividá ganadera.
Pa más información: https://www.mapa.gob.es/es/ganaderia/temas/sanidad-animal-higiene-ganadera/sanidad-animal/enfermedades/virus_shamonda