REGAPA - Rexistru Esplotaciones Ganaderes del Principáu d´Asturies

Primero d’empezar l’actividá ganadera nel territoriu del Principáu d’Asturies, les esplotaciones tienen que tar inscrites nel Rexistru d’Esplotaciones Ganaderes del Principáu d’Asturies (REGAPA), que ta integráu na sección ganadera del Rexistru d’Esplotaciones Agraries d’Asturies (Decretu 11/90, de 8 de febreru).

Pa que les inscriban nel REGAPA, les esplotaciones han cumplir los requisitos que, si ye’l casu, establezan les normatives respectives d’ordenación zootécnica o de sanidá y bienestar animal.

Los datos básicos d’esti rexistru inclúyense nel rexistru xeneral de les esplotaciones ganaderes (REGA), d’ámbitu nacional y calter informativu.

A toa esplotación inscrita van asigna-y un códigu d’identificación (d’equí p’arriba, CEGA) y ha cuntar con un llibru rexistru d’esplotación, en soporte papel o informáticu, que’l titular tien que tener actualizáu.

Delles previsiones pa tener en cuenta:

• El titular de cada esplotación ganadera inscrita va ser el responsable de los animales de la esplotación pa los efectos previstos nes normes sobre sanidá, producción y bienestar animal.
• Dientro d’una esplotación nun va poder rexistrase más d’una orientación zootécnica por especie. Tampoco nun se van inscribir a nome d’un mesmu titular dos o más esplotaciones con idéntica especie y orientación zootécnica si dalgún de los sos allugamientos s’atopen na mesma localidá o si, nun coincidendo les localidaes, el manexu de los animales d’eses esplotaciones nun se realiza de forma independiente.
• La inscripción d’una esplotación nel REGAPA, igual que los cambeos de datos, incluyíos los cambeos de titularidá, o les baxes d’esplotaciones yá rexistraes, van tener efectos a partir de la fecha de la resolución del procedimientu.

Pa más información y realizar trámites rellacionaos: RECE0028T01 - Registru d´Esplotaciones Ganaderes: alta o cambéu de datos de la esplotación