Aforru y eficiencia enerxética - ASUME

Plan d´aforru y eficiencia enerxética nel Principáu d´Asturies

El Gobiernu del Principáu d’Asturies ye sabedor del retu tan importante que supón el contestu enerxéticu actual y del papel exemplarizante que tienen qu’asumir les Alministraciones nesta materia, polo que’l 9 d’agostu del 2022 constituyóse la Mesa Rexonal de Coordinación Enerxética como grupu de trabayu específicu pa coordinar la implementación de les midíes obligatories d’eficiencia enerxética y de reducción de la dependencia enerxética del gas natural definíes nel Real Decretu Llei 14/2022 mentáu, de 1 d’agostu, amás de pa definir les midíes adicionales qu’esta comunidá autónoma ta faciendo y tien previsto facer nesti ámbitu.

Nesta mesa rexonal, coordinada por trés direcciones xenerales (D. X. d’Enerxía, Minería y Reactivación y D. X. Xeneral d’Industria, de la Conseyería d’Industria, Emplegu y Promoción Económica, y la D. X. de Patrimoniu y Xuegu, de la Conseyería de Facienda) y col sofitu técnicu de la Fundación Asturiana de la Enerxía, hai una participación amplia y implicación de l’Alministración autonómica.

De resultes d’eso, ellaboróse y unvióse al Ministeriu pa la Transición Ecolóxica y el Retu Demográficu, un plan que establez el modelu de gobernanza, les midíes que vienen de siguío de meyora enerxética nos edificios y infraestructures públiques autonómiques, amás de los indicadores pal so siguimientu.

1. Desenvolvimientu d’una campaña de concienciación y sensibilización en materia d’aforru d’enerxía.
2. Cartel de midíes d’aforru enerxéticu pa fomentar l’usu racional de la enerxía.
3. Impulsu a la rehabilitación y meyora enerxética de los edificios y infraestructures públiques.
4. Inclusión de requisitos d’eficiencia y aforru nes llicitaciones de contratación na Alministración del Principáu d’Asturies.
5. Impulsu a alcuerdos marcu de contratación del suministru enerxéticu.
6. Zarru antemanáu d’edificios alministrativos públicos.
7. Impulsu al teletrabayu y la racionalización d’horarios.
8. Realización d’un inventariu y monitorización de consumos.
9. Plan de despliegue d’autoconsumu.
10. Movilidá sostenible.
11. Midíes d’axilización en xestión d’ayudes y xestión d’espedientes.
12. Impulsu a los contratos con empreses de servicios enerxéticos.