Inspecciones periódiques d'eficiencia enerxética

D'alcuerdu colo indicao n'artículu 21 del vixente Reglamentu d'instalaciones térmiques nos edificios, d'equí p'alantre RITE, aprobáu pol Real Decretu 1027/2007 de 20 de xunetu y modificáu pol Real Decretu 238/2013, de 5 d'abril (Boletín Oficial del Estáu númberu 89 de 13 d'abril del 2013) les instalaciones térmiques de los edificios van inspeccionase a lo llargo de la so vida útil, cola mira de verificar el cumplimientu de les esixencies d'eficiencia enerxética.

La instrucción técnica IT 4 del RITE determina les instalaciones que tienen de ser oxetu d'inspección periódica, asina como los conteníos y plazos d'estes inspecciones, y los criterios de valoración y midíes a adoptar como resultáu de les mesmes, en función de les característiques de la instalación.

Les inspecciones d'eficiencia enerxética van realizase de manera independiente poles entidaes o axentes cualificaos acreditaos polos órganos competentes de les distintes comunidaes autónomes, escoyíos llibremente pol titular de la instalación d'ente los habilitaos pa realizar estes funciones.

Les obligaciones de les entidaes y axentes acreditaos pol Principáu d'Asturies pa la realización de les inspecciones periódiques d'eficiencia enerxética tán recoyíes n'artículu 9 del Decretu 11/2015, de 4 de marzu, pol que se desenvuelven aspectos determinaos del Reglamentu d'Instalaciones Térmiques nos Edificios en materia de puesta en serviciu de les instalaciones, inspecciones, entidaes, axentes y espertos. (Boletín Oficial del Principáu d'Asturies númberu 59, de 12 de marzu del 2015)

En cumplimientu del apartáu 5 del artículu 29 del RITE, el Serviciu de Fluyíos y Metroloxía pon a disposición pública'l llistáu actualizáu de les entidaes y axentes acreditaos nel Principáu d'Asturies qu'ufierten los servicios d'espertos d'esta mena pa la realización de les inspecciones periódiques de les instalaciones térmiques.

Asina mesmo, estes inspecciones, tamién van poder ser realizaes poles entidaes y axentes que figuren nos llistaos de los respectivos órganos competentes d'otres comunidaes autónomes.