CAP (Certificáu d'Aptitú Profesional)

Los conductores de la Unión Europea o d’un país terceru que tean trabayando pa una empresa establecida na Unión Europea, y que precisaren dalgún de los permisos de conducir de les categoríes C1, C1+E, C, C+E, D1, D1+E, D o D+E pa desempeñar la so profesión.

Nun van tener la obligación de tener la tarxeta CAP los conductores d’estos vehículos:

1. Aquellos con una velocidá tope autorizada que nun supere los 45 quilómetros por hora.
2. Los qu’usen los servicios de les Fuercies Armaes, la Protección Civil, los bomberos, los cuerpos y fuercies de seguranza y los servicios d’ambulancies d’emerxencia, o tean baxo’l control de les fuercies y organismos mentaos, siempre que’l tresporte seya consecuencia de les funciones correspondientes a estos servicios.
3. Los que tean siendo sometíos a pruebes en carretera pa fines de meyora técnica, reparación o caltenimientu, o bien seyan nuevos o tresformaos y entá nun se punxeren en circulación.
4. Aquellos qu’esixen tar en posesión d’un permisu de conducir de les categoríes D o D1, conducíos, ensin pasaxeros, por personal de caltenimientu nos desplazamientos a o dende’l centru de caltenimientu a la empresa de tresportes pa la que fai’l caltenimientu, siempre que la conducción nun seya l’actividá principal del conductor.
5. Los usaos en situaciones d’emerxencia o que s’empobinen a misiones de salvamentu, incluyíos los usaos nel tresporte humanitariu ensin ánimu d’arriquecimientu.
6. Los usaos nes clases práctiques y nos esámenes pensaos pa sacar el permisu de conducción o’l certificáu d’aptitú profesional, siempre que nun se faiga un tresporte nestes actividaes.
7. Los usaos pa facer tresporte priváu particular de viaxeros o mercancía definíu nel artículu 101 de la Llei 16/1987, del 30 de xunetu, d’Ordenación de los Tresportes Terrestres.
8. Los usaos pa facer tresporte priváu complementariu onde namás se tresporten materiales, equipos o maquinaria pa usu del conductor nel exerciciu de la so profesión, siempre que la conducción del vehículu nun seya l’actividá principal del conductor.
9. Los usaos pa facer les modalidaes de tresporte señalaes nes lletres b) y e) del artículu 33.2 del Reglamentu de la Llei d’Ordenación de los Tresportes Terrestres, aprobáu pol Real Decretu 1211/1990, del 28 de setiembre.
10. Los usaos pa circular nes zones rurales pal abastecimientu de la propia empresa del conductor, siempre que se trate de tresporte priváu complementariu y seya ocasional.
11. Los vehículos usaos o arrendaos ensin conductor por empreses agrícoles, hortícoles, forestales, ganaderes o marineres pal tresporte de mercancía nel marcu de la so propia actividá empresarial, sacante si la conducción forma parte de l’actividá principal del conductor o si la conducción supera una distancia de 100 quilómetros alredor del centru d’esplotación.

Cualificación inicial

Pensada pa les persones que sacaron el permisu de conducir a partir del:

• 11 de setiembre del 2008 (pa los conductores de les categoríes D1, D1+E, D o D+E, o d’un permisu reconocíu como equivalente).
• 11 de setiembre del 2009 (pa los conductores de les categoríes C1, C1+E, C o C+E, o d’un permisu reconocíu como equivalente).

Supón la realización d’un cursu teórico-prácticu nún de los centros CAP autorizaos y la superación d’un esame primero de que trescurra 1 añu a cuntar dende la fecha na qu’acabe’l cursu.

Formación continua

Desque sacáu’l CAP inicial, ha renovase cada 5 años.

Supón la realización d’un cursu de 35 hores de duración nún de los centros CAP autorizaos pa que los conductores actualicen los conocimientos esenciales pal exerciciu de la so función.

Cumplíos los requisitos establecíos enantes pa cada modalidá de formación, l’órganu competente va espidir una tarxeta CAP a caúna de les persones que lo pidan nel modelu establecíu y depués de pagar la tasa correspondiente.

Plazu tope de validez de la tarxeta: cinco años.

Los conductores van tener que renovar la tarxeta CAP primero de la fecha de caducidá. Pa eso, han superar un cursu de formación continua de 35 hores nún de los centros CAP autorizaos y, depués, pidir la tarxeta CAP según el procedimientu establecíu.

La espedición d’una tarxeta CAP nueva va riquir que’l conductor tenga’l permisu de conducir vixente y supón la retirada de la tarxeta anterior.

Desque sacada la tarxeta CAP, los conductores van tener que la llevar a bordu del vehículu tol tiempu o, si ye’l casu, llevar el documentu qu’acreíte la so vixencia.