Toponimia oficial d'Asturies
¿Qué ye?
El Nomenclátor Xeográficu de la Toponimia Oficial d’Asturies ye un catálogu ordenáu y xerarquizáu de los nomes oficiales de les entidaes de población, según consten nos decretos d’oficialización aprobaos pol Conseyu de Gobiernu y publicaos en Boletín Oficial del Principáu d’Asturies (BOPA).
Esti proyectu tan ambiciosu supunxo un retu importante pal Serviciu de Cartografía del Principáu d’Asturies, que s’enfrentaba a la xeolocalización y organización territorial de 23.944 topónimos oficializaos, repartíos a lo llargu de tol territoriu asturianu.
¿Cuántos topónimos se localizaron?
Hasta’l momentu, localizáronse un total de 16.641 topónimos oficiales de 63 conceyos. Pa consiguilo fixeron falta 268 xornaes de trabayu de campo en pueblos, parroquies y conceyos, percorriendo 61.672 km (una vez y media la vuelta al mundu).
De los 16.641 topónimos, 11.214 nun tán reconocíos como entidaes de población pol Institutu Nacional d’Estadística, y cerca de 12.000 correspuenden a emplazamientos de tamañu menor al pueblu o llugar (los categorizaos como quintanes, cases, barrios urbanos, barrios interiores, y otros), quier dicise, topónimos mui complexos de localizar, porque les más de les veces namás los conoz la vecindá del llugar.
¿Cómo se fizo'l trabayu?
Resultó imprescindible la collaboración de los conceyos y les asociaciones locales, d’abondes persones a títulu particular, amás d’otres espertes y estudioses de la toponimia. A toes elles espresamos equí’l nuestru agradecimientu sinceru.
Invirtiéronse amás cientos d’hores nel estudiu de los informes toponímicos encargaos pola Conseyería de Cultura, la consulta de la Cartografía Oficial del Principáu d’Asturies, del Institutu Xeográficu Nacional, les bases del Catastru y demás fontes cartográfiques, la busca de la bibliografía existente; en particular, de les publicaciones de l’Academia de la Llingua Asturiana.
Usando les tecnoloxíes d’información xeográfica más avanzaes, xeneráronse bases de datos espaciales comprensives de los topónimos xeorreferenciaos, depuraes como correspuende y cumpliendo los estándares aplicables de calidá.
¿Qué se obtien?
Finalmente, púnxose a disposición del públicu la información xenerada, siguiendo los principios establecíos pa los datos abiertos y la reutilización de la información:
- 620 parroquies
- 63 capitales de conceyu
- 42 núcleos urbanos
- 20 urbanizaciones
- 31 barrios urbanos
- 4.160 pueblos, llugares y barrios
- 5.135 barrios interiores a pueblos
- 5.590 quintanes
- y 980 otros sitios
¿Cómo s'accedi a esa información?
Toa esta información tan detallada facilítase al públicu al traviés del xeoportal SITPA-IDEAS, pente medies d’un serviciu web y pue descargase en formatos diferentes (shape, KML, GML y Excel), coles lleendes correspondientes.
Pa más información sobro'l Nomenclátor xeográficu de la toponimia oficial d'Asturies