Zonificación demográfica

El Decretu de Zonificación Xeográfica ye una de les midíes clave previstes na Llei d’Impulsu Demográficu y que va dexar focalizar meyor les polítiques públiques que traten l’avieyamientu y la llucha contra’l despoblamientu.

El nucleu de la normativa ye l’Indicador Sintéticu d’Estáu Demográficu d’Asturies (ISDA), una ferramienta qu’evalúa y clasifica a los conceyos en cuatro categoríes. Pa calcular esti indicador, que se va revisar cada dos años, tiénense en cuenta diez variables basaes en fontes estadístiques públiques: densidá de población, índices d’avieyamientu (mayores de 65 años) y de población infantil (hasta los 14 años), tases de natalidá y mortalidá, masculinidá (proporción d’homes y muyeres d’ente 15 y 49 años), fluxos migratorios, tasa d’emplegu, medría real y volume total de población.

Esi cálculu dexa clasificar a los conceyos nuna escala de cuatro pasos según la so situación demográfica:

• Conceyos Dinámicos. Aquellos onde los componentes del indicador sintéticu son mayoritariamente favorables. Sumen una población de 561.789 persones.
• Conceyos Inestables. Aquellos onde los componentes nun los dexen pertenecer a la categoría anterior por nun ser mayoritariamente favorables, pero onde los indicadores simples compensen ente sí. Sumen 234.702 habitantes.
• Conceyos en Crisis Demográfica. Aquellos que presenten problemes demográficos nos más de los componentes del indicador sintéticu. Sumen 173.543 habitantes.
• Conceyos en Riesgu de Despoblamientu. Aquellos que los sos componentes son bien negativos y muestren una mengua severa de la población. Sumen una población de 39.565 persones.