Agua llimpia y Saneamientu - Oxetivu de Desenvolvimientu Sostenible 6

Garantizar la disponibilidá y la xestión sostenible del agua y el saniamientu pa toos

L’accesu al agua apto pal consumu y al saniamientu nun se pueden estremar d’una sociedá avanzada. Lo que nun va munches xeneraciones yera un lluxu pa tantes families asturianes, güei vémoslo como daqué dafechamente natural. Nun ye asina n’otros países y otres families.

Una parte importante de la humanidá nun tien accesu a agua potable y el cambéu climáticu representa una carga pesada sobre los recursos hídricos, d’ehí que precisemos, tamién n’Asturies, una xestión racional d’estos recursos si queremos conservalos.

Les metes que marcó Naciones Uníes pa esti ODS na Axenda 2030 son:

6.1 D’equí al 2030, llograr l’accesu universal y equitativu al agua potable a un preciu algamadizu pa toos.

6.2 D’equí al 2030, llograr l’accesu a servicios de saniamientu y hixene adecuaos y equitativos pa toos y poner fin a la defecación albentestate, poniendo atención especial nes necesidaes de les muyeres y les neñes y les persones en situaciones de vulnerabilidá.

6.3 D’equí al 2030, meyorar la calidá del agua amenorgando la contaminación, quitando’l vertimientu y minimizando la emisión de productos químicos y materiales peligrosos, reduciendo a la metá’l porcentaxe d’agua residual ensin tratar y aumentando considerablemente’l recicláu y la reutilización ensin riesgos a nivel mundial.

6.4 D’equí al 2030, aumentar considerablemente l’usu eficiente de los recursos hídricos en tolos sectores y asegurar la sostenibilidá de la estracción y l’abastecimientu d’agua dulce pa facer frente a la escasez d’agua y amenorgar considerablemente’l númberu de persones que nun tienen agua.

6.5 D’equí al 2030, implementar la xestión integrada de los recursos hídricos a tolos niveles, inclusive cola cooperación tresfronteriza, según proceda.

6.6 D’equí al 2030, protexer y restablecer los ecosistemes rellacionaos col agua, incluyíes les mates, los montes, los humedales, los ríos, los acuíferos y los llagos.

6.a D’equí al 2030, ampliar la cooperación internacional y el sofitu emprestáu a los países en desenvolvimientu pa la creación de capacidá n’actividaes y programes tocante al agua y el saniamientu, como los de captación d’agua, desalinización, usu eficiente de los recursos hídricos, tratamientu d’agua residual, recicláu y tecnoloxíes de reutilización.

6.b Sofitar y afianzar la participación de les comunidaes locales na meyora de la xestión del agua y el saniamientu.