Educación de calidá - Oxetivu de Desenvolvimientu Sostenible 4
Garantizar una educación inclusiva y equitativa de calidá y promover oportunidaes d´aprendimientu permanente pa toos
La educación ye la ferramienta más importante p’ameyorar la vida de les persones. Dende la educación infantil hasta la enseñanza universitaria l’alumnáu va garrando saberes y forxando’l so calter, lo que va definir quién van ser como persones adultes, a qué vida van poden aspirar, a qué trabayos o a qué rellaciones personales.
La educación ye la escalera que dexa que les persones puedan aspirar a una vida meyor, d’ehí que seya tan importante la calidá de la enseñanza y que seya equitativa y inclusiva independientemente de si son homes o muyeres, ricos o probes, de zones urbanes o de zones rurales.
Les metes que marcó Naciones Uníes pa esti ODS na Axenda 2030 son:
4.1 D’equí al 2030, asegurar que toles neñes y tolos neños rematen la enseñanza primaria y secundaria, que tien que ser gratuita, equitativa y de calidá y producir resultaos d’aprendimientu pertinentes y efectivos.
4.2 D’equí al 2030, asegurar que toles neñes y tolos neños tengan accesu a servicios d’atención y desenvolvimientu na primer infancia y educación preescolar de calidá, cola mira de que tean preparaos pa la enseñanza primaria.
4.3 D’equí al 2030, asegurar l’accesu igualitariu de tolos homes y toles muyeres a una formación técnica, profesional y superior de calidá, incluyida la enseñanza universitaria.
4.4 D’equí al 2030, aumentar considerablemente’l númberu de xente mozo y adulto que tien les competencies precises, sobre manera técniques y profesionales, p’acceder al emplegu, el trabayu decente y l’emprendimientu.
4.5 D’equí al 2030, poner fin a les disparidaes de xéneru na educación y asegurar l’accesu igualitariu a tolos niveles de la enseñanza y la formación profesional pa les persones vulnerables, incluyíes les persones con discapacidá, los pueblos indíxenes y los neños y neñes en situaciones de vulnerabilidá.
4.6 D’equí al 2030, asegurar que tola xente mozo y una proporción considerable de los adultos, tanto homes como muyeres, tean alfabetizaos y tengan nociones elementales d’aritmética.
4.7 D’equí al 2030, asegurar que tolos alumnos y alumnes garren los conocimientos teóricos y prácticos precisos pa promover el desenvolvimientu sostenible, ente otres coses cola educación pal desenvolvimientu sostenible y los estilos de vida sostenibles, los derechos humanos, la igualdá de xéneru, la promoción d’una cultura de paz y non violencia, la ciudadanía mundial y la valoración de la diversidá cultural y la contribución de la cultura al desenvolvimientu sostenible.
4.a Construyir y adecuar instalaciones educatives que tengan en cuenta les necesidaes de los neños y les persones con discapacidá y les diferencies de xéneru, y qu’ufierten entornos d’aprendimientu seguros, non violentos, inclusivos y eficaces pa toos.
4.b D’equí al 2020, aumentar considerablemente a nivel mundial el númberu de beques disponibles pa los países en desenvolvimientu, sobre manera nos países menos adelantaos, los Estaos insulares pequeños en desenvolvimientu y los países africanos, cola mira de que los sos estudiantes puedan matriculase en programes d’enseñanza superior, incluyíos programes de formación profesional y programes técnicos, científicos, d’inxeniería y de tecnoloxía de la información y les comunicaciones, de países desenvueltos y otros países en desenvolvimientu.
4.c D’equí al 2030, aumentar considerablemente la ufierta de docentes calificaos, inclusive cola cooperación internacional pa la formación de docentes nos países en desenvolvimientu, sobre manera los países menos adelantaos y los Estados insulares pequeños en desenvolvimientu.