Igualdá de xéneru - Objetivu de Desenvolvimientu Sostenible 5

Llograr la igualdá de xéneru y empoderar a toles muyeres y les neñes

A pesar de les meyores n’igualdá, les muyeres y les neñes siguen sufriendo discriminación y violencia, tamién n’Asturies. Estudios científicos demostraron que la igualdá de xéneru ye la base pa consiguir un mundu más xustu y más pacíficu, pero’l sexu femenín sigue cobrando salarios inferiores a los de los homes, faciendo los más de los llabores rellacionaos cola casa o colos curiaos, sufriendo violencia de xéneru y tando infrarrepresentaes na esfera pública. Tenemos que terminar cola discriminación de la muyer na nuestra sociedá.

Les metes qu’afitó Naciones Uníes pa esti ODS na Axenda 2030 son:

5.1 Poner fin a toles formes de discriminación contra toles muyeres y les neñes en tol mundu.

5.2 Eliminar toles formes de violencia contra toles muyeres y les neñes nos ámbitos públicu y priváu, incluyíes la trata y la esplotación sexual y otros tipos d’esplotación.

5.3 Eliminar toles práctiques nocives, como’l matrimoniu infantil, precoz y forzáu y la mutilación xenital femenina.

5.4 Reconocer y valorar los curiaos y el trabayu domésticu non remunerados al traviés de servicios públicos, infraestructures y polítiques de protección social, y promoviendo la responsabilidá compartida na casa y na familia, según proceda en cada país.

5.5 Asegurar la participación plena y efectiva de les muyeres y la igualdá d’oportunidaes de lideratu a tolos niveles decisorios na vida política, económica y pública.

5.6 Asegurar l’accesu universal a la salú sexual y reproductiva y los derechos reproductivos, d’alcuerdu col Programa d’Acción de la Conferencia Internacional sobre la Población y el Desenvolvimientu, la Plataforma d’Acción de Beijing y los documentos finales de les sos conferencies d’exame.

5.a Entamar reformes qu’otorguen a les muyeres igualdá de derechos a los recursos económicos, amás d’accesu a la propiedá y al control de la tierra y otros tipos de bienes, los servicios financieros, la herencia y los recursos naturales, d’alcuerdu coles lleis nacionales.

5.b Ameyorar l’usu de la tecnoloxía instrumental, sobre manera la tecnoloxía de la información y les comunicaciones, pa promover l’empoderamientu de les muyeres.

5.c Aprobar y fortalecer polítiques acertaes y lleis aplicables pa promover la igualdá de xéneru y l’empoderamientu de toles muyeres y les neñes a tolos niveles.