Planificación
EPLIFA: Estrategia Integral de Prevención y Lucha contra Incendios Forestales en Asturias
La Estratexa Integral de Prevención y Llucha contra les Quemes Forestales n'Asturies 2026‑2030 (EPLIFA, poles sigles en castellán) foi aprobada pol Conseyu de Gobiernu y configúrase como l'instrumentu de referencia pa orientar l'acción pública frente a les quemes forestales nos próximos años. La estratexa remata un procesu de trabayu técnicu y de coordinación interdepartamental nel que participaron les conseyeríes competentes en materia de mediu ambiente, mediu rural y emerxencies, y qu'incorpora la esperiencia acumulada y l'adaptación a los escenarios de riesgu nuevos asociaos al cambéu climáticu y a la evolución de los usos del territoriu.
La EPLIFA establez un modelu de planificación integral basáu na xestión del riesgu, que prioriza la prevención estructural, l'anticipación y la intervención sobre'l territoriu, articulándose al traviés de programes y llinies d'actuación que se van esplegar pente medies de planes anuales. Ente les sos llinies principales, la estratexa impulsa la meyora del conocimientu y del análisis del riesgu con ferramientes cartográfiques avanzaes, refuercia l'actuación na interfaz urbano-forestal y afianza les polítiques de xestión preventiva del territoriu, integrando estes acciones na planificación forestal y territorial del Principáu.
Planes anuales de prevención
La ellaboración del Plan Anual de Prevención, Vixilancia y Estinción del Principáu d’Asturies pa la campaña 2025 obedez a lo dispuesto n’artículu 48 de la Llei 43/2003, de 21 de payares, de Montes, que dispón que les Comunidaes Autónomes énte’l riesgu xeneral de quemes forestales, van ellaborar y van aprobar planes anuales pa la prevención, vixilancia y estinción de quemes forestales. Los planes referíos van incluyir la totalidá de les actuaciones a desenvolver y van garrar la totalidá del territoriu de la Comunidá Autónoma correspondiente. L’oxetivu principal d’esti plan ye ser un instrumentu de xestión anual en materia de quemes forestales dende una perspectiva integral de prevención, vixilancia y estinción. L’ámbitu territorial va ser el de la totalidá del territoriu del Principáu d’Asturies y l’ámbitu temporal abarca la campaña 2024-2025, concretamente’l so desenvolvimientu garra dende’l 1 de payares del 2024 hasta’l 31 d’ochobre del 2025.
Plan Anual de Prevención, Vixilancia y Estinción del Principáu d’Asturies 2026 (BOPA 28/10/2025)
Plan Anual de Prevención, Vixilancia y Estinción del Principáu d’Asturies 2025 (BOPA 30/10/2024)
Plan Anual de Prevención, Vixilancia y Estinción del Principáu d’Asturies 2024 (BOPA 30/10/2023)