Horros y paneres

La regulación llegal de los horros y paneres fundaméntase nesto:

• Un Decretu de 1973, que protexe los horros de más de cien años énte intervenciones que pudieren alteriar la so traza.
• La Llei de Patrimoniu Históricu Español de 1985, qu’equipara de manera xenérica la so protección a la de los bienes d’interés cultural.
• La Llei de Patrimoniu Cultural d’Asturies del 2001, qu’afita dellos niveles de protección nos horros a tenor de la so antigüedá y limita l’algame de lo contemplao en 1985 a aquellos elementos qu’individualmente se protexan.
• El Reglamentu de desenvolvimientu de la Llei de Patrimoniu Cultural d’Asturies del 2015, que prohíbe actuaciones nun horru o panera que dañen los sos valores culturales y establez los usos permitíos (los tradicionales recoyíos nel derechu consuetudinariu asturianu).

Sobre la base d’esta normativa empezó nos últimos años un procesu de reflexón alredor del horru y la panera asturiana y de los sos posibles usos nuevos. Esti debate fundamentóse nestos documentos de trabayu:

• Registro de soluciones técnicas tradicionales para el montaje de hórreos y paneras (pdf: 47 Mb), de Gonzalo García y Santiago Astuy
• El lenguaje clásico del hórreo asturiano. Serie tipológica y quintana (12,1 Mb), de Juan Pedrayes, Astur Paredes y Salvador Barro
• Documento marco de recomendaciones sobre la gestión de bienes patrimoniales de carácter etnológico: hórreos y paneras (pdf: 8 Mb), de Cristina Cantero Fernández

Depués de dellos años de debate y constituyida con esa mira una Mesa del Horru, con representantes de tolos sectores implicaos na xestión, protección, estudiu y difusión del horru y la panera asturianos, llegóse nel 2023al alcuerdu de concretar un plan d’actuaciones, que se definen nel llamáu Plan del Horru y se desenvuelven nuna ventena d’actuaciones que yá empezaron a executase. Ente elles, rescampla una modificación normativa pa facilitar trámites de treslláu d’horros, facer más fácil el procesu d’autorización d’intervenciones y contemplar usos nuevos adaptaos a la realidá actual de la sociedá y la economía. Esta modificación normativa ta en fase de tramitación anguaño.