Detección y control de l´aviéspora asiática

Antecedentes

Les especies exótiques invasores (EEI) constituyen la segunda causa de perda de biodiversidá nel mundu tres del cambéu del hábitat. La Llei 42/2007, de 13 d’avientu, del Patrimoniu Natural y de la Biodiversidá, define una especie exótica invasora como “aquella que s’introduz o establez nun ecosistema o hábitat natural o seminatural y que ye un axente de cambéu y amenaza pa la diversidá biolóxica nativa, bien pol so comportamientu invasor o pol riesgu de contaminación xenética”.

Vespa velutina ye una aviéspora nativa del sureste asiáticu. El so rangu de distribución natural incluye Bangladesh, Bután, China (incluyendo Hong Kong), India, Indonesia, la República de Corea, Laos, Malasia, Birmania, Tailandia y Vietnam.

Esta especie detectóse pela primer vez n’Europa nel departamentu de Lot-et-Garonne en Francia y convirtióse d’esa manera na primer invasión exitosa d’esta aviéspora n’Europa. L’orixe de la so introducción sigue siendo inciertu. Sicasí, los datos recoyíos localmente indiquen qu’una o unes poques reines ivernantes foron importaes dende China nun barcu de mercancíes que llegó a Burdeos nel 2004. La invasión del país vecín por parte de l’aviéspora asiática foi bien rápida de magar entró, confirmándose la so presencia a últimos del 2011 na metá de los departamentos del país.

N’España la primer cita confirmada realizóse n’agostu del 2010 n’Amaiur, población de la comarca Navarra del Baztán y, esi mesmu añu, foi detectada tamién nel País Vascu, concretamente en Guipúzcoa.

N’Asturies apaez pela primer vez nel 2014 nel conceyu de San Tiso d’Abres, procedente de la estensión al traviés de Galicia d’un focu apaecíu nel 2011 en Viana do Castelo (Portugal). Dos años más tarde apaez tamién na zona oriental de la comunidá procedente de la estensión del focu francés al traviés del cordal cantábricu.

El so éxitu de multiplicación y espansión nel territoriu européu débese a dellos factores: les coincidencies de tipu climáticu (temperatura y precipitaciones), les fontes d’alimentu a disposición (colonies d’abeyes de la especie Apis mellifera, que nun disponen d’estratexes de defensa énte la invasora) y l’ausencia de depredadores o competidores directos eficaces pa compensar la so tasa alta de reproducción.

Esta invasión tien efectos n’ámbitos variaos: socioeconómicu (provoca daños na apicultura y na agricultura en xeneral y, dientro d’ella, sobre manera a la fruticultura), biodiversidá (ye depredadora d’abeyes y otros insectos polinizadores) y na salú pública (riesgu de picadures, grave sobre manera pa persones alérxiques).

La Estratexa de xestión, control y posible erradicación de l’aviéspora asiática o aviéspora prieta (Vespa velutina ssp.) n’España foi aprobada pola Comisión Estatal pal Patrimoniu Natural y la Biodiversidá’l 14 de payares del 2014 y pola Conferencia Sectorial de Mediu Ambiente’l 16 d’abril del 2015, y nella establécense acciones comunes pal control y la posible erradicación de l’aviéspora asiática n’España basándose na conocencia adquirida hasta la fecha por aquelles comunidaes autónomes onde anguaño ta presente la especie.

Nel marcu d’esa estratexa ellabórase’l Plan d’Actuación pa la Detección y Control de l’Aviéspora Asiática (Vespa velutina nigritorax) nel Principáu d’Asturies cola mira d’establecer unos mecanismos pal control de la población de Vespa velutina na comunidá autónoma. Con eso búscase amenorgar los impactos negativos en zones onde yá s’estableció, amás d’evitar la espansión de la especie na midida de lo posible. La revisión última del plan publicóse nel 2020 (BOPA 154, de 10/08/2020).

Evolución de la invasión

En base a los datos de los años últimos, pue adelantase que la invasora dexó atrás la so fase más espansiva y, anque con altibaxos, paez qu’entra nuna fase d’estabilización. Ye lo que se pue esperar d’un organismu que llegó pa ocupar un nichu ecolóxicu nel que dispón d’un clima afayadizu, alimentu abondo y ausencia de depredadores y competidores eficaces.

Gráfico comparativa interanual de nidos

Normativa

Esta aviéspora ta incluyida nel Catálogu español d’especies exótiques invasores (Real Decretu 630/2013, de 2 d’agostu) y ta propuesta pa ser incluyida na Llista d’Especies Exótiques Invasores esmolecedores pa la Unión, en base al Reglamentu Européu (Reglamentu UE N.u 1143/2014, del Parllamentu Européu y del Conseyu de 22 d’ochobre del 2014 sobre la prevención y la xestión de la introducción y espardimientu d’especies exótiques invasores). Esta especie incluyóse yá nel Real Decretu 1629/2011, de 14 de payares, pol que se regula la llista y catálogu español d’especies exótiques invasores, y ta ente les especies recoyíes nel Decretu 630/2013, de 2 d’agostu, pol que se regula’l catálogu español d’especies exótiques invasores. A nivel européu esta especie ta recoyida nel Reglamentu d’Execución (UE) 2016/1141 de la Comisión, de 13 de xunetu del 2016, pol que s’adopta una llista d’especies exótiques invasores esmolecedores pa la Unión d’alcuerdu col Reglamentu (UE) n.u 1143/2014 del Parllamentu Européu y del Conseyu.

Collaboración ciudadana

La collaboración ciudadana ye fundamental en caúna de les fases de control de la invasora:

  • Trampes preventives de reines (namás de febreru a xunu)
  • Detección y notificación de niales

Pa xestionar esa collaboración dispónse d’una plataforma web accesible dende cualquier dispositivu con conexón a internet (web, Android y iOS).

avisAP (aplicación pal control de la Vespa velutina n´Asturies)

Medios para avisar si ves un nido de avispa asiática

Informes d´actividá

Otra información